Obamanın İranla gizli razılığa gəldiyi təsdiq olundu

"...istənilən hərbi əməliyyat müsbət qiymətləndiriləcək"

Ölkə.Az Livanın The Daily Star qəzetinə istinadən xəbər verir ki, ABŞ-ın dövlət katibi Con Kerri bu gün bəyan edib ki, İranın İraqda İŞİD-ə qarşı aparacağı istənilən hərbi əməliyyat müsbət qiymətləndiriləcək.

"Əgər İran bu və ya digər yerdə İŞİD-lə mübarizədə iştirak edirsə, bunun yalnız müsbət effekti ola bilər", - deyə Kerri koalisiya dövlətləri nümayəndələrinin Brüssel görüşündə çıxış edərkən bildirib. Dövlət katibi İranın İŞİD terrorçularına qarşı mübarizəyə qoşulduğunu təsdiq etməsə də, eyni zamanda, təkzib də etməyib.

Xatırladaq ki, İranın "Fanton" F-4 qırıcıları İraq səmasında görüntülənmişdi. Pentaqon Tehranın İŞİD mövqelərinə zərbələr endirməsini təsdiq etsə də, ABŞ rəhbərliyi bunun həqiqətə uyğun olmadığını bəyan etmişdi.

Obamanın İranla apardığı gizli yazışmalar Qərbdə narazılıq dalğasının yaranmasına səbəb olmuşdu. Diplomatların fikrincə, Obama İranın İŞİD-ə qarşı mübarizəyə qoşulmasının müqabilində nüvə proqramı üzrə danışıqları təxirə salmağa razılaşmışdı. Bu isə İslam Respublikasını nüvə silahının istehsalına daha da yaxınlaşmasına gətirib çıxara bilərdi.

Rəşid Mustafazadə

Ölkə.Az