Rusiyada azərbaycanlı tərəfindən öldürülən dünya çempionunun istintaqı davam edir
"Ölkə.Az" xəbər verir ki, bu günə qədər Anar Allahverənovu saxlamaq mümkün olmayıb. Cinayət işi ilə bağlı istintaq və axtarış tədbirləri davam edir. Bu gün isə aparılan istintaq çərçivəsində 2 nəfər barəsində cinayət işi açılıb.
Rusiyanın İstintaq Komitəsinin Xabarovsk vilayəti üzrə idarəsinin məlumatına əsasən Rusiya Milli Qvardiyasının vilayət üzrə İdarədənkənar Mühafizə Xidmətinin 2 əməkdaşı haqqında cinayət işi qaldırılıb. Onlar səhlənkarlıq maddəsi ilə ittiham edilirlər.
Hadisə 20 avqust tarixində Xabarovsk vilayətində baş verib. Ticarət mərkəzinin mühafizəçisi dava üçün toplaşan insanları görərək həyəcan siqnalı verib. Hadisə yerinə İdarədənkənar Mühafizə Xidmətinin 2 əməkdaşı cəlb edilib. İnsident onların gözü qarşısında baş verib. İdarə əməkdaşları davaya müdaxilə etməyiblər. Onlar həm də Andrey Draçovu qətlə yetirən Anarı saxlamayıblar və səssiz-səmirsiz şəkildə ərazini tərk ediblər.
Andreyin ölümünə isə aldığı kəllə-beyin zədəsi səbəb olub. Allahverənov insidentdən sonra ərazidən qaçıb. Hazırda Allahverənov federal axtarışa verilib. Onun yeri barədə məlumat verən şəxs üçün 500 min rubl mükafat təyin edilib.
Hikmət Həsənov
Ölkə.Az
