Xətai polisi taksi sürücülərinə qarşı dələduzluq edən şəxsi yaxalayıb

"Ölkə.Az"-ın əldə etdiyi məlumata əsasən, ötən ayın 19-da taksi fəaliyyəti ilə məşğul olan Elçin Bayramov Binəqədi Rayon Polis İdarəsinə (RPİ) müraciət edərək bildirib ki, cari ilin noyabr ayının16-da özünü Türkiyə vətəndaşı kimi təqdim edən Ayhan adlı şəxsi müştəri qismində əvvəlcə Sumqayıt şəhərinə, daha sonra isə Bakı Beynəlxalq Avtovağzalına aparıb. Sumqayıt şəhərində həmin şəxs taksi sürücüsünə bildirib ki, üzərində 100 dollar var və ona təcili 25 manat lazımdır. Taksi sürücüsündən həmin pulu alan “Ayhan” pulu xırdalayıb 25 manatı və gediş haqqını ödəyəcəyini bildirib. Avtovağzal ərazisində isə həmin şəxs taksi sürücüsünün “Hisense” markalı mobil telefonunu da dələduzluq yolu ilə alaraq hadisə yerindən uzaqlaşıb.

Binəqədi RPİ əməkdaşlarının həyata keçirdikləri əməliyyat-axtarış tədbirləri nəticəsində dələduzluq etməkdə şübhəli bilinən Bakı şəhər sakini Tehran İsmayılov saxlanılaraq istintaqa təqdim olunub. Araşdırma zamanı T.İsmayılovun daha bir taksi sürücüsünün 100 manat pulunu dələduzluq yolu ilə mənimsədiyi məlum olub.

Ancaq taksi sürücülərinə vurduğu ziyan küllü miqdar olmadığından T.İsmayılov barəsində istintaq dövründə polis nəzarəti altına vermə qətimkan tədbiri seçilib. 

Bu günlərdə isə T.İsmayılovun digər analoji cinayətləri barədə Xətai RPİ-nə şikayətlər daxil olub və taksü sürücülərinin qənimi yenidən həbs edilib.