300 min manatlıq dələduzluq edən qadın yenidən saxlanılıb
"Ölkə.Az"-ın əldə etdiyi xəbərə əsasən, 2015-ci ilin fevral ayında Binəqədi rayon Polis İdarəsi 6-cı Polis Bölməsi əməkdaşlarının keçirdiyi əməliyyat-axtarış tədbirləri nəticəsində 2014-cü il avqust ayında Bakı şəhər sakini Gülşən İmranovanın etibarından sui-istifadə edərək 42000 manat dəyərində saxta zərgərlik məmulatları satmaqla dələduzluq əməli törətməkdə şübhəli bilinən Bakı şəhər sakinləri - 1959-cu il təvəllüdlü Hüseynova Asyaxanım Həsən qızı, 1961-ci il təvəllüdlü Orucova Sevinc Elman qızı və 1974-cü il təvəllüdlü Əliyeva Könül Oqtay qızı tutulublar.
İstintaq dövründə məlum olub ki, hər 3 qadın qızıl alverçisini aldararaq ona külli miqdarda saxta qızıl verib və ondan 300 min manatdan artıq pul alıblar. Zərərçəkən qızılların saxta olmasını bildikdən sonra polisə müraciət edib.
Sonra Bakı Ağır Cinayətlər Məhkəməsində dələduzluqda təqsirləndirilən 1959-cu il təvəllüdlü Hüseynova Asyaxanım Həsən qızı, 1961-ci il təvəllüdlü Orucova Sevinc Elman qızı və 1974-cü il təvəllüdlü Əliyeva Könül Oqtay qızına cəza verilsə də, Bakı Apellyasiya Məhkəməsinin qərarı ilə Könül Əliyeva azadlığa çıxıb.
Ancaq çox keçmədən qadının yeni cinayət əməlləri üzə çıxıb və onun barəsində BŞBPi-də yenidən cinayət işi başlayıb. İstintaqdan yayınan qadın ötən gün yenidən həbs edilib.
