50 manata görə 71 yaşlı qadını qətlə yetirənin məhkəməsi

“Ölkə.Az” xəbər verir ki, Gəncə Ağır Cinayətlər Məhkəməsində hakim Elmin Rüstəmovun sədrliyi ilə baş tutan hazırlıq iclasında təqsirləndirilən Gədəbəy rayon sakini Babək Məmmədovun anket məlumatları dəqiqləşdirilib. 

Daha sonra prosesdə çıxış edən prokuror bildirib ki, cinayət işi üzrə ibtidai istintaqı aparan orqan prosessual qaydalara əməl edib, işin dayandırılmasına və ya geri qaytarılmasına heç bir səbəb yoxdur. 

Prokuror bildirib ki, cinayət işi düzgün olaraq adiyyatı üzrə Gəncə Ağır Cinayətlər Məhkəməsinə göndərilib. O, çıxışının sonunda cinayət işinin məhkəmə baxışına verilməsini tələb edib. 

Hakimlər də cinayət işinin məhkəmə baxışına verilməsi barədə qərar qəbul edib. 

Məhkəmənin baxış iclası martın 27-nə təyin edilib. 

İttihama görə, ötən il avqustun 5-də naməlum şəxs Gədəbəy rayonunun İnəkboğan kənd sakini Əjdər Ələkbərovun evinə qanunsuz daxil olaraq ona qarşı zor tətbiq edib, müxtəlif xəsarətlər yetirərək pul tələb edib.

Məqsədinə nail olmadıqda isə ev sahibinə məxsus “Nokia” markalı telefonu götürərək hadisə yerini tərk edib.

Keçirilən təxirəsalınmaz istintaq və əməliyyat-axtarış tədbirləri nəticəsində həmin cinayət əməlini rayonun Qasımlı kənd sakini Babək Məmmədovun törətdiyi müəyyən olunub və o, polis əməkdaşları tərəfindən tutulub.

Avqustun 8-də onun barəsində həbs-qətimkan tədbiri seçilib. 

İlkin istintaq hərəkətləri zamanı Babək Məmmədovun rayon ərazisində daha bir analoji hadisə və bir qəsdən adam öldürmə cinayəti törətməsi də müəyyənləşdirilib.

Belə ki, 2016-cı il noyabrın 26-da gecə vaxtı Babək Məmmədov pəncərədən keçməklə rayonun Köhnəqışlaq kənd sakini Müşgünaz Məmmədovanın yaşadığı evə daxil olaraq onu bıçaqla hədələyib və pul tələb edib. O, evdən əlli manat pul, həmçinin evin sahibəsinə məxsus pensiya kartını quldurluq yolu ilə ələ keçirib.

Təqsirləndirilən şəxs Babək Məmmədov istintaqa ifadəsində 2016-cı il dekabrın 13-də rayonun Qasımlı kənd sakini, 71 yaşlı Səmayə Məmmədovanı yaşadığı evin həyətində tamah məqsədilə qətlə yetirdiyini də etiraf edib.