Bakının məşhur otelində ukraynalı oğurluğa məruz qalıb
“Ölkə.Az”-a rayonun hüquq-mühafizə orqanlarından verilən məlumata görə, Ukrayna vətəndaşı Viktoriya Burdena “Askar” oteldə dincələn zaman ona məxsus 2 ədəd qızıl boyunbağı və 1 ədəd bilərzik oğurlanıb. Bu barədə zərərçəkən əcnəbi DİN-nin elektron poçtuna şikayət məktubu yazaraq ölkəni tərk edib.
Baş vermiş hadisə ilə bağlı Nərimanov RPİ-də təhqiqat araşdırmalarına başlanılıb. Polis İdarəsindən “Ölkə.Az”-a verilən məlumata görə, oğurluq cinayətinin yaxın zamanlarda açılması istiqamətində axtarış-əməliyyat tədbirlərinə başlanılıb.
Oğurluq cinayəti ilə bağlı “Askar” otelin mövqeyini öyrəndik. Oteldən bildirdilər ki, “ukraynalı qadın mart ayının 8-də qızıl əşyalarının oğurlanması barədə onlara məlumat verib”. Ancaq otel rəhbərliyi əcnəbinin başına gələnlə bağlı heç bir tədbir görmədiyindən qadın DİN-nə müraciət etmək məcburiyyətində qalıb.
