Namusunu təmizləmək üçün dostlarını öldürən qardaşların cinayət işi
“Ölkə.Az”ın məlumatına görə, Arzuman və Mülayim Abdinov qardaşlarının məhkəmə prosesinə hakim Əli Seyfəliyev sədrlik edəcək.
Hadisənin təfərrüatlarına gəldikdə, qısqanclıq zəminində qətl törətməkdə təqsirli bilinən Masallı rayon sakinləri - 1971-ci il təvəllüdlü Arzuman Abdinov və onun qardaşı, 1979-cu il təvəllüdlü Mülayim Abdinova Cinayət Məcəlləsinin 120.2.1-ci (bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (təşkilat) tərəfindən adam öldürmə) və 120.2.4-cü (xüsusi amansızlıqla və ya ümumi təhlükəli üsulla adam öldürmə) maddələri ilə ittiham verilib.
Lənkəran Ağır Cinayətlər Məhkəməsinin hökmü ilə təqsirləndirilən şəxslərin hər biri 18 il müddətinə azadlıqdan məhrum ediliblər.
Hökmdən narazı qalan təqsirləndirilən şəxslər apellyasiya şikayəti veriblər. Onlar barələrində olan hökmün ləğv edilməsini və daha yüngül cəza ilə əvəz edilməsini xahiş ediblər.
Hökmdən narazı qalan mərhum Pünhan Şiriyevin həyat yoldaşı da apellyasiya şikayəti verib. Zərərçəkmişin hüquqi varisi qeyd edib ki, Abdinov qardaşları barəsində olan cəza daha ağır cəza ilə əvəz edilməlidir. O, vurğulayıb ki, Abdinov qardaşları onun həyat yoldaşını xüsusi amansızlıqla öldürüblər.
Şirvan Apelyasiya Məhkəməsində hakim Ələsgər Novruzovun sədrliyi ilə baş tutan prosesdə qərar elan edilib. Qərara görə, həm təqsirləndirilən şəxslərin, həm də zərərçəkmiş tərəfin şikayəti təmin edilməyib.
Ailənin yeganə oğlu, 35 yaşlı klarnetçalan dünənə qədər yaxın dost bildiyi şəxslər tərəfindən niyə amansızlıqla öldürüldü?
Masallı rayonunun Ərkivan qəsəbəsində olduqca dəhşətli bir hadisə baş verib – 1979-cu il təvəllüdlü, 2 uşaq atası, ailənin yeganə oğul övladı Şiriyev Pünhan Cəbrayıl oğlu yaxın dostları -Mülayim və Arzuman Abdinovlar tərəfindən amansızlıqla döyülüb və Pünhan aldığı yaralardan 10 gün sonra dünyasını dəyişib.
Necə deyərlər, indi isə daha ətraflı. Pünhan Mülayim və Arzumanla yaxın dost olub. Onlar Pələnküştədə bir məhəllənin uşaqları olublar. Pünhanın valideynləri - ata və anasının, eləcə də digərlərinin bildirdiyinə görə, bu şəxslər olduqca yaxın, necə deyərlər, bir evli kimi olublar, bir sinifdə oxuyublar, demək olar ki, vaxtaşırı bir yerdə çörək kəsib, toya, yasa birlikdə gediblər.
İttiham aktına görə, A.Abdinov 2014-cü ilin iyul ayının əvvəllərində Rusiya Federasiyasından qayıdıb. O, qayıtdıqdan sonra qonşusu Pünhan Şiriyevin bacısı Nargilə ilə mütəmadi olaraq telefonla danışıb və münasibət saxladığını öyrənib.
O, 31 iyul 2014-cü il tarixdə, saat 20 radələrində özünün, qardaşı Mülayimin ailə üzvləri və Nargilə ilə birlikdə Masallı rayonunun İstisu istirahət zonasında yerləşən “Cənnət bağı” adlanan restorana gəliblər.
Orada Arzuman qardaşı ilə birlikdə spirtli içki qəbul edib və sərxoş vəziyyətdə olduqları vaxt Pünhan Şiriyevin dəvət edilmədiyi halda yeməkxanaya gəldiyini görüb.
Həmin vaxt Pünhan onlarla bir masaya oturub. Bu zaman Arzuman Pünhanın bacısı ilə görüşmək məqsədi ilə gəldiyini hesab edib. O, qısqanclıq zəminində Pünhandan qisas alıb, onu qəsdən öldürmək qərarına gəlib.
Bu məqsədlə Arzuman həmin gecə saat 01 radələrində yaşadıqları Ərkivan qəsəbəsindəki evə geri qayıtdıqdan sonra Pünhanın bacısı ilə olan münasibətləri barədə M.Abdinova məlumat verib, onu qəsdən öldürmək barədə niyyətini bildirib. İki qardaş əlbir olan bir qrup şəxs təşkil edib və Pünhandan qisas alıb, qəsdən öldürmək barədə aralarında razılığa gəliblər.
Pünhanın valideynləri - atası Cəbrayıl və anası Sədayənin danışdıqlarına görə, hadisə baş verən gün, iyulun 31-i axşamı Pünhan “Lanur” şadlıq sarayında toyda olub. Toydan sonra Abdinov qardaşları Qəriblər kəndindəki “Cənnət bağı” deyilən istirahət mərkəzindən ona zəng vurublar ki, burada ailəvi çay içirlər, maşınla gəlib, onları evlərinə aparsın. Pünhan da gedib. Həmin vaxt Pünhana evdən, həyat yoldaşı də zəng vurub ki, niyə yubanırsan, deyib, Mülayim və Arzumanla yuxarıda çay içirik.
Daha sonra Pünhan başqa bir dostuna – Elşənə zəng vurub ki, Ərkivan döngəsində gözlə, filankəslərlə gəlirik, sənin maşınına ehtiyac var. Lakin sonradan o, Pünhanın telefonuna cavab verməyib.
Anası Sədayə Şiriyevanın dedikləri:
“Sonradan öyrəndik ki, Pünhangil dostlarla birlikdə Ərkivana gəlib, Pələnküştə məhəlləsində, Abdinovların evlərinin qarşısında maşını saxlayıb. Abdinovlar öz ailə üzvlərini düşürüblər. Uşaqlar maşını batırdığına görə Pünhan onu yuduzdurmaq istəyir. Arzuman deyir ki, maşını moykada yudurdaram. Bu söhbət saat 1-3 arası olub. Həmin söhbəti qonşular eşidib. Daha sonra isə Pünhanı döyə-döyə maşına əyləşdirərək təxminən gecə saat 2-də kəndin yuxarısına aparıblar.
Onlar kəndin yuxarısında Pünhanı ölümcül döyüblər. Bütün zərbələr onun başına vurulub. Hətta Abdinovların beşbarmaqdan da istifadə etdiyi bildirilir. Həmçinin bildirirəm ki, onu döyən təkcə Mülayim və Arzuman Abdinov qardaşları olmayıb. Şaiq, Azər, Nizami və taksi sürücüsü Zülfüqar da hadisə yerində olub və Abdinovlara kömək ediblər. Lakin onlar istintaqa cəlb olunmayıb. Daha sonra onlar Pünhanı onun öz maşınında Ərkivan qəsəbəsinin cənub tərəfində, “Ağabəyin zapravkası” deyilən ərazinin yaxınlığındakı çayxananın yanına gətiriblər. Burada maşının qapısını da açıq saxlamaqla, Pünhanı yaralı vəziyyətdə qoyublar ki, guya o sərinlənir. Beləcə çıxıb gediblər. Mülayim və Arzuman artıq saxlanılıb və onlar barəsində həbs qətimkan tədbiri seçilib”.
Hadisə baş verən günün səhəri Pünhanın valideynləri hadisədən xəbər tutub və ağır vəziyyətdə olan oğlanlarını Bakıya, Əhmədli qəsəbəsindəki Neyrocərrahiyyə xəstəxanasına müalicəyə aparıblar. Pünhan 10 gün Bakıdakı xəstəxanalarda reanimasiya şöbəsində yatsa da, onu xilas etmək mümkün olmayıb və Pünhan Şiriyev avqust ayının 10-da dünyasını dəyişib.
Bəs aralarından, necə deyərlər, su keçməyən bu dostlar nədən bir-birinə qarşı belə amansız olublar?
Yuxarıda qeyd etdik ki, Pünhan Şiriyev Mülayim və Arzuman Abdinov qardaşları ilə çox yaxın dost olublar. Bu qardaşlar Pünhan vasitəsi ilə musiqiçilər dəstəsinə də daxil olub və əksər günlərini musiqiçilərlə keçiriblər.
2 ay öncə Musakücə yolunda avtomobil qəzası baş verəndə və həmin qəzada müğənni Rövşən Həşimov dünyasını dəyişəndə Mülayim də həmin maşında olub. Dolaşan söhbətlərə görə, Rövşən Mülayimlə birlikdə Lənkərana kredit götürməyə gedib və Rövşənin adına oradan 20 min manata yaxın kredit götürülüb. Qəzadan sonra isə həmin pul yoxa çıxıb.
Pünhanın anası bildirir ki, Mülayim kefli olanda bu barədə Pünhana danışıb. Bunu qoçuluqlarından biri kimi qeyd edib. Səhəri gün Pünhan həmin söhbəti Mülayimə xatırladanda isə o, çox narahat olub. İndi valideynləri ehtimal edirlər ki, Pünhan onun sirrini bildiyi üçün, məhz izi itirməkdən ötrü Pünhanı qətlə yetiriblər.
Digər bir ehtimal da var. Guya Pünhan Mülayim və Arzumanın yaxın qadın qohumlarından birini söyüb təhqir edib və qardaşlar da bunun intiqamını almaq üçün Pünhanı belə amansızlıqla öldürüblər. Daha bu söyüşmə harada olub, nə üstündə olub, nə vaxt olub - bunu dəqiq deyən yoxdur.
Daha bir ehtimal ondan ibarətdir ki, “Cənnət bağı”nda çay içərkən guya Pünhan Mülayimin stulunda oturub, bu da Mülayimin acığına gəlib.
Mülayim və Arzuman Abdinovlar kimdir?
Bu qardaşlar Ərkivanda tanınmış idmançı-məşqçi olan, bir neçə il öncə dünyasını dəyişmiş Xanoğlan Abdinovun oğlanlarıdır. Onlar 3 qardaşdır, əsasən Moskva şəhərində yaşayırlar və güclü biznesləri var. Pünhanın anasının bildirdiyinə görə, bu qardaşlar xoşagəlməz əməllərlə məşğul olurlar. Onların dediyinə görə, bu qardaşlar bir neçə dəfə adam öldürüblər, lakin pulun hesabına həbsdən qurtulublar. Onların narkotiklə məşğul olması ilə bağlı da şaiyələr dolaşır. Lakin bu barədə əldə heç bir sübut yoxdur.
