Bakıda ağır qəza: FİFA referisi öldü

Azərbaycanlı FİFA referisi Xəlil Hüseynli dünyasını dəyişib.

Ölkə.Az xəbər verir ki, bu barədə apasport.az saytına AFFA-nın Hakimlər Komitəsinin (HK) sədri Xaqani Məmmədov məlumat verib.

O bildirib ki, 29 yaşlı hakim bu gün avtomobil qəzasında həlak olub.

“Xəlil Hüseynli avtomobil qəzasında dünyasını dəyişib. Hazırda onun hüzr mərasimindəyik”, - HK sədri bildirib.

Futzal üzrə FİFA referisi olan Hüseynli bu gün səhər 11:00-12:00 radələrində Zabrat yolunda ağır avtoqəza keçirib. Nəticədə 29 yaşlı hakim faciəvi şəkildə dünyasını dəyişib, idarə etdiyi "VAZ 2106" markalı avtomobil isə tamamilə yararsız hala düşüb.

Məmmədov bildirib ki, mərhum bu dəqiqələrdə torpağa tapşırılacaq: “Acı xəbər bizi sarsıtdı. Özümüzü pis hiss edirik. Cənazəsi evindən götürülür. İndilərdə mərhumu torpağa tapşıracağıq”.

***

Bakının Sabunçu rayonu ərazisində ölümlə nəticələnən qəza baş verib.

Ölkə.Az-ın Fövqəladə Hallar Nazirliyinin mətbuat xidmətinə istinadən verdiyi məlumaqta görə, iki “VAZ” markalı minik avtomobili toqquşub.

Nəticədə şəxsiyyəti məlum olmayan sürücü hadisə yerində dünyasını dəyişib. Deformasiyaya uğramış avtomobildə sxılmış vəziyyətdə qalmış sürücünün cəsədi xilasedicilər tərəfindən avtomobildən çıxarılaraq aidiyyəti üzrə təhvil verilib.