6 nəfərlik dəstə iranlı tələbəni niyə öldürdü?
“Ölkə.Az”ın xəbərinə görə, biri qız olmaqla ağır cinayətdə təqsirli bilinən dəstə üzvlərinin məhkəmə prosesinin hazırlıq iclası iyun ayının 11-də hakim Səbuhi Hüseynovun sədrliyi ilə keçiriləcək.
Xatırladaq ki, ötən ilin oktyabr ayında İran İslam Respublikasının vətəndaşı Mohtati Saman Nemat oğlunun meyiti yaşadığı Sumqayıt şəhəri, Novxanı bağlar massivindəki evində aşkar olunub.
Sumqayıt ŞPİ əməkdaşlarının həyata keçirdikləri əməliyyat tədbirləri nəticəsində hadisəni törətməkdə şübhəli bilinən əvvəllər məhkum olunmuş şəhər sakinləri Yunus Allahverdi oğlu Camallı, Natiq Əjdər oğlu Babaverdiyev, Şəki şəhər sakini Pərvin Aydın oğlu Əlməmmədov, Ağsu rayon sakini Zahid Vaqif oğlu Dünyamalıyev və İmişli rayon sakini Ceyhun Səxavət oğlu Talıblı tutularaq istintaqa cəlb olunublar.
Aparılan ilkin istintaq tədbirləri nəticəsində müəyyən olunub ki, dəstə üzvləri quldurluq yolu ilə özgə əmlakını ələ keçirmək məqsədilə qabaqcadan əlbir olub ötən il oktyabrın 11-də gecə saat 4 radələrində mərhumun yaşadığı ünvana gəlib evə qanunsuz daxil olaraq S.Mohtatini qəsdən öldürüblər. Amma dəstə üzvləri evdən hər hansı qiymətli əşya əldə edə bilməyiblər. Həmin evə basqın etməyi bir müddət əvvəl hadisənin baş verdiyi mənzilin qonşuluğunda usta işləyən Y.Camallı digər dəstə üzvlərinə təklif edib.
“Otağa Ceyhun, mən, Natiq girdik. Gördük ki, qarşımızda adam yatıb. Üçümüz də onun üstünə qaçdıq. Birimiz ayağını, birimiz ağzını bağladıq”, - deyə saxlanılan Yunus Camallı bildirib.
Digər həbs edilən şəxs Natiq Babaverdiyev qeyd edib ki, evdə adam olduğunu bilməyiblər:
“Evi boş bilirdik. Sonra bir nəfər çıxdı. Onun da əl-qolunu bağladıq, sinəsinə oturduq. Qayıdıb gələndən sonra bildik ki, ölüb”.
Dəstə üzvləri qeyd edilən cinayəti törətməyə Z.Dünyamalıyevin avtomobili ilə gediblər. O, hadisədən sonra yenidən dəstə üzvləri ilə Novxanı qəsəbəsində görüşərək onların hər birini yaşadıqları ünvanlara aparıb.
Saxlanılan şəxslərin ətraflarında Sumqayıt ŞPİ-də aparılan əlavə əməliyyat tədbirləri ilə onların cari ilin avqustun 14-də Kürdəmir rayon Xırdapay kəndində yaşayan Zahid Zərbəliyevə məxsus evə basqın etdikləri də məlum olub. Saxlanılan şəxslər ev sahibi və həyat yoldaşı Rənanın əl-ayağını yapışqanlı lentlə bağlayaraq mənzildə olan pul və qızıl-zinət əşyalarını quldurluq yolu ilə ələ keçiriblər.
“Avtomobillə rayona getdik. Dedi ki, evi göstər. Bibimgilə də iki giriş var. Həmişə arxa balaca qapıdan girib-çıxmışıq. Dedim dəqiq bilmirəm dəyişilib. Bunun yerinə olub balaca taxta qapı”, - cinayətdə əli olan Rəşidə Mürşüd qızı Seydiyeva deyib.
