Mətn ölçüsü:
  • 100%

Azərbaycanda universitetdə əməliyyat

Gəncə Dövlət Universitetinin Ekologiya kafedrasının müdri Vaqif Rəhimov korrupsiya ittihamı ilə həbs edilib. 
 
Bu barədə Gəncədəki mənbələrimizdən məlumat daxil olub. 
 
Məlumatda iddia olunur ki, Vaqif Rəhimov hələ Müəllimlər İnstitutunun Gəncə filialında işlədiyi vaxt bir neçə vətəndaşdan külli miqdarda pul alıb və onlara övladlarını Gəncə Müəllimlər İnstitutuna qəbul etdirəcəyinə dair söz verib. Vaqif Rəhimovun bu işi Müəllimlər İnstitutunun rəhbəri Ramiz Məmmədovla birgə planlaşdırdığı bildirilir. Amma onların bu planı baş tutmayıb. Belə ki, aldadılan valideynlərin şikayətinə əsasən, bir müddət öncə Müəllimlər İnstitutunun Gəncə filialında saxta tələbə qəbulu ilə məşğul olan, daha sonra Gəncə Dövlət Universitetinin Ekologiya kafedrasının müdiri vəzifəsinə təyin olunan Vaqif Rəhimov bir neçə gün öncə həbs edilib və Kürdəxanı təcridxanasına aparılıb. 
 
Məlumatda vurğulanır ki, Vaqif Rəhimovu Gəncə Dövlət Universitetinin Ekologiya kafedrasının müdiri vəzifəsinə Gəncə Dövlət Universitetinin rektoru Yusif Yusibov gətirib. 
 
Məlumatı verən mənbənin sözlərinə görə, Təhsil Nazirliyi Azərbaycan Müəllimlər İnstitutunun Gəncə filialının fəaliyyətinə xitam verdikdən sonra valideynlərin bir neçəsi pullarını ala bilmədiklərinə görə onun xarici markalı maşınını və evini satdıraraq pullarını almağa nail olub, amma bir neçə valideyn isə hələ də pulunu ala bilməyib. 
 
Mənbə bildirir ki, Vaqif Rəhimovla adı korrupsiyada hallanan məmurlar isə azadlıqda gəzir, təkcə o, həbs olunub. Onun sözlərinə görə, Müəllimlər İnstitutunun sabiq rektoru Ramiz Məmmədov və Gəncə Dövlət Universitetinin rektoru Yusif Yusibovun da adını  bu olayda hallandığına baxmayaraq, onların hansısa səbəbdən bu əməliyyatdan qurtula biliblər. 
 
Mövzunu diqqətdə saxlayacağıq. 
 
Yazıda  adı keçən şəxslərin də mövqeyini dərc etməyə hazırıq. (Arqument.Az)
 
Ölkə.Az