Xədicə İsmayıla qarşı yeni ittihamlar
Hazırda həbsdə olan jurnalist Xədicə İsmayıla qarşı yeni ittihamlar irəli sürülüb.
Bu barədə onun vəkili Fariz Namazlı məlumat verib.
Onun sözlərinə görə, Xədicə İsmayıl CM-in 179.3.2(mənimsəmə və israf etmə), 192.2.2 (qanunsuz sahibkarlıq), 213.1(vergi ödəməkdən yayınma) və 308.2-ci (vəzifə səlahiyyətlərindən istifadə olmaqla ) maddələrlə ittiham olunub.
Vəkil deyir ki, ittihamlar “Azadlıq” radiosunun fəaliyyəti haqqında 15 yanvar 2015-ci il tarixli vergi aktı əsasında irəli sürülüb.
Vəkil bildirib ki, Xədicə İsmayıl özünü təqsirli bilmir və ifadə verməkdən imtina edib.
Bu ittihamlara görə, onu 12 ilədək həbs cəzası gözləyir.
Xədicə İsmayıl başqasını özünü öldürmə həddinə çatdırmaq ittihamı ilə dekabrın 5-də həbs edilib.
O ittihamı rədd edir, həbsinin fəaliyyəti ilə bağlı olduğunu deyir.
Rəsmilər isə onun konkret şikayət əsasında həbs olunduğunu deyirlər. (Turan)
