Ata və iki oğulun döydüyü polislər haqqında yeni məlumatlar

Bugün Nərimanov rayonu, Ə.Rəcəbli küçəsində Bakı şəhər sakini 1991-ci il təvəllüdlü İlqar Əliyevin idarə etdiyi Mercedes markalı 99 GV 350 nömrəli avtomobillə yol hərəkəti qaydalarını pozduğuna görə Dövlət Yol Polisi İdarəsinin əməkdaşları tərəfindən saxlanılıb.

Bu zaman sürücü və maşındakı ailə üzvləri olan sərnişinlərlə polis əməkdaşları arasında mübahisə düşüb. Sonradan isə mübahisələr əlbəyaxa davaya çevrilib.

Məlumatda sürücü İlqar Əliyev, atası İsmayıl Əliyev, qardaşı Fərid və Elşad Qasımov polis serjantı Rüfət Əlizadəni, polis baş serjantları Faiq Əhmədovu və Cavanşir Qasımovu döyərək xəsarət yetiriblər.

Ölkə.Az bildirir ki, bu məlumatdan dərhal sonra Xeber1.az-ın redaksiyasına sözügedəm polis əməkdaşları — polis baş serjantları Faiq Əhmədov və Cavanşir Qasımov haqqında ilginc məlumatlar daxil olub.

Məlumatda qeyd olunur ki, hər iki polis əməkdaşı özlərini DYP əməkdaşından daha çox kriminal «aləmin» avtoritetləri kimi aparırlar. Belə ki, onlar mənasız yerə maşınlar saxlayaraq özünəməxsus hədə-qorxu ilə vətəndaşları narazı salırlar. Məlumatda qeyd olunur ki, bu polis əməkdaşlarının ən sevdiyi kəlmələr «Səni şöbəyə aparıb diz çökdürərəm», «Başına oyun açaram», «Az danış, sənədi ver» və s. kimi nalayiq sözlərdir. İddiaya görə onlar nəinki sürücülərə, eyni zamanda piyada hərəkət edən vətəndaşlara da söz atmaqdan çəkinmirlər.

Müraciətdə qeyd olunur ki, insanlar bu polis əməkdaşlarından çox narazıdırlar. Onların «məhsuldar» fəaliyyəti nəticəsində vətəndaşlar sözügedən qurumdan ciddi şəkildə şikayətçidirlər. Əgər bununla bağlı hər hansı bir tədbir görülməsə insanlar Ölkə rəhbərliyinə müraciət edəcəklərini iddia edirlər.

Qarşı tərəfin mövqeyini dərc etməyə hazırıq.

Ölkə.Az