Şəkidə 11 il əvvəl törədilmiş qətlin üstü açılıb

Aparılmış əməliyyat axtarış tədbirləri nəticəsində qətli törətmiş şəxs polis tərəfindən saxlanılıb.

Hadisə ilə bağlı Baş prokurorluq və Daxili İşlər Nazirliyi birgə məlumat yayıb.

Məlumatda bildirilir ki, 2013-cü il sentyabrın 27-də Şəki şəhəri, B.Vahabzadə küçəsindəki yarımçıq tikilinin zirzəmisində insan skeleti aşkar edilib. Məhkəmə-tibbi-kriminalistik və digər ekspertizaların rəyləri ilə həmin skeletin 2004-cü il oktyabrın 10-da xəbərsiz itkin düşmüş 20 yaşlı Şəki sakini Xəyalə Mövsümovaya məxsus olması müəyyən edilib. Həyata keçirilən istintaq- əməliyyat tədbirləri nəticəsində qətli törətməkdə şübhəli bilinən Bakı sakini, əvvəllər dəfələrlə məhkum olunmuş, 33 yaşlı Ramil Salamov tutulub. Aparılmış istintaqla müəyyən edilib ki, Ramil Salamov 2004-cü il oktyabrın 10-da tanışı Xəyalə Mövsümova ilə görüşərək, onu Vahabzadə küçəsindəki yarımçıq tikiliyə gətirib və münaqişə zəminində orada boğaraq öldürüb. Cinayətin izlərini itirmək məqsədilə bir gün sonra Ramil Salamov yenidən həmin yerə gələrək meyidi basdırıb və əynindəki paltarları da çıxararaq zibillikdə yandırıb.

Şəki Rayon məhkəməsinin qərarı ilə Ramil Salamov barəsində həbs qəti imkan tədbiri seçilib, iş üzrə zəruri istintaq-əməliyyat tədbirləri davam etdirilir. (Region TV)

Ölkə.az