Qazaxıstanda dəhşətli qəza: 15 nəfər həlak oldu

Ölənlərdən üçü uşaqdır.

Qazaxıstanın Cambıl vilayətində (respublikanın cənubunda) dəhşətli yol qəzasında 14 Qırğızıstan və bir qazax vətəndaşı həlak olub, daha beş nəfər yaralanıb, Qırğızıstan FHN-nin saytında bildirilir, Ölkə.Az xəbər verir.

İdarənin məlumatına görə, qəza ötən bazar Cambıl vilayətinin Moyınkumsk rayonunda, Alma-Ata – Yekaterinburq avtomobil yolunun 487-ci kilometrində baş verib.

“Qazel-2705” yük avtomobili (Sahibi Almatı vilayətinin sakinidir) Bişkekdən Şimali Qazaxıstan vilayəti istiqamətində hərəkət edən və içərisində 19 nəfərin olduğu “Mercedes-Benz Sprinter” markalı mikroavtobusla toqquşub.

Qəza nəticəsində nəqliyyat vasitələri yanıb, hadisə yerində 14 nəfərin yanmış cəsədi (“Qazel”in sürücüsü və 3-ü uşaq olmaqla, 13 sərnişin) aşkarlanıb.

Məlumata görə, daha bir mikroavtobus sərnişini aldığı yaralardan Karaqanda vilayətinin Priozyorsk xəstəxanasında dünyasını dəyişib. Mikroavtobusun həlak olan sərnişinləri Qırğızıstan vətəndaşlarıdır.

Daha beş sərnişin müxtəlif bədən xəsarətləri ilə Karaqanda vilayətinin Priozyorsk şəhər xəstəxanasına çatdırılıb.

Ölkə.Az