“Polis bu işə baxmadı, mənim də silaha əl atmaqdan başqa çarəm qalmadı”

Dünən Binəqədi rayonu ərazisində yerləşən məcburi köçkünlərin məskunlaşdığı binada atışma olub

Ağdamdan məcburi köçkün olan Hicran Səfərov həmyerliləri olan Ayxan və onun atası Rövşəni güllələyib. Ölkə.Az xəbər verir ki, H.Səfərovun yaxınları milli.az-a bildiriblər ki, əslində qanlı hadisənin təməli bu il iyulun 30-da qoyulub. Həmin gün saat 20 radələrində Hicran Səfərovun oğlu Coşqunu bıçaqlayıblar. Bıçaqlayan şəxs isə qonşuları Ayxan olub. Dərnəgüldə yerləşən trolleybus parkında Ayxanın atası Rövşən oğluna deyib ki, bıçağı götür, sox Coşqunun qarnına. Ayxan da atasının sözünə əməl edib, bıçaqla Coşqunun ayağına iki zərbə vurub. Həmin hadisədən sonra H.Səfərov polisə şikayət edib, lakin hadisənin baş verməsindən 62 gün keçməsinə baxmayaraq, Ayxan və atası istintaqa cəlb olunmayıblar. Bu azmış kimi, bir neçə gün əvvəl atası Ayxana Dərnəgüldəki restoranlardan birində dəbdəbəli ad günü məclisi keçirib.

“Bu o deməkdir ki, mən qanun tanımıram, adam bıçaqlasam da azadlıqdayam. Ayxan Coşqundan başqa daha 3 nəfəri də bıçaqlayıb. Bir neçə müddətlik yoxa çıxsa da, sonradan yenidən Dərnəgüldəki evlərinə qayıdıb. Bunu da heç bir valideyn götürə bilməz, övladını bıçaqlasınlar, amma cinayətkar azadlıqda gəzsin. Hicran Səfərov da oğlunun qanını alacağını deyərək silahı götürüb və ata-balanı güllələyib. Hər ikisini ayağından vurub”, - deyə H.Səfərovun yaxını deyib. 

H.Səfərov qisasını alandan sonra könüllü şəkildə polisə gedərək özünü təslim edib və cinayəti övladının qanını almaq üçün etdiyini etiraf edib. “Polis bu işə baxmadı, mənim də silaha əl atmaqdan başqa çarəm qalmadı”, -deyərək qan tökməsinə haqq qazandırıb. 

Binəqədi Rayon Polis İdarəsindən bildirilib ki, hazırda istintaq aparılır. 

Ölkə.Az