Səidə Sultan danışdı: "Prodüseri buna görə öldürüblər"

Müğənni Səidə Sultan keçmiş prodüseri Hamlet Cahangirovun öldürülməsinin səbəbləriylə bağlı ehtimalını açıqlayıb.

Sənətçi Ölkə.az-a açıqlamasında H.Cahangirovu emosional insan kimi xarakterizə edib:

"Hamlet çox çılğın, emosional və haqsızlığa dözümsüz insan idi. Ola bilər ki, kimsə ona söz atıb, bu da dözməyib cavab verib. Çox güman ki, bu səbəbdən öldürüblər. Amma prodüser kimi çox çalışqan idi. Sadəcə, bir az tez inciməyi var idi".

Səidə Sultan prodüserin borclu olduğunu da söyləyib:

"Kiməsə səkkiz min manat borcu var idi. Borcun yarısını qaytarsa da, qarşı tərəf ondan polisə şikayət etmişdi. Yazığın bir lal anası, bir də qoca nənəsi var. Ona görə çox üzülürəm"

Qeyd edək ki, hadisə Yasamal rayonunun Zahid Xəlilov küçəsi, 523-cü məhəllədə baş verib. H.Cahangirova bıçaqla yeddi zərbə vurulub. Faktla bağlı Yasamal Rayon Polis İdarəsi, 26-cı Polis Bölməsi və rayon prokurorluğuna məlumat verilib. 26-cı bölmənin əməkdaşları cinayəti törətməkdə şübhəli bilinən Səbail rayon sakinləri Mirzəyev Yusif Cavanşir oğlu, Həsənov Sahib Telman oğlu və Şahbazov Fərid Çingiz oğlunu saxlayaraq istintaqa təhvil veriblər. Saxlanılan şəxslər barəsində cinayət işi açılıb, istintaq davam edir.

Xatırladaq ki, mərhum prodüser bundan əvvəl Zarina Məmmədova, Mətanət Əsədova və əməkdar artist Zöhrə abdullayeva ilə də qısa müddətdə işləyib.

İntiqam VALEHOĞLU
Ölkə.az