Bakıdakı güclü yanğın: \"Uşağını evdə qoymuşdu\" - TƏFƏRRÜAT (VİDEO)

Xəbər verdiyimiz kimi, Bakının Yasamal rayonunda güclü yanğın baş verib.

80 nəfər bina sakininin təxliyə olunduğu hadisənin bəzi təfərrüatları məlum olub.

“Ölkə.Az”ın əldə etdiyi məlumata görə həmin ünvanda yaşayan 4 nəfər hadisə vaxtı mənzildə olmayıb. Versiyalardan biri kimi yanğının baş verməsinə səbəb həmin vaxt mənzildə ütünün qoşulu vəziyyətdə qalması deyilir.

Məlumata görə, hadisə səbəbindən yanan mənzilin ətrafındakı evləri su basıb.

“Sağ olsun, bina sakinləri köməklik elədilər. Balaca uşaqları yaşlı qadınları vaxtında ərazidən uzaqlaşdıra bildilər. Əllərində su gətirən sakinlərdə var idi. Allaha şükür, heç kimə heç nə olmadı. Çaşbaş qalıb uşağını belə mənzildə unudan adamlar oldu. Amma hamı bir nəfər kimi köməklik elədi”, - şahid ölkə.az-a bildirib. 

Hadisənin dəqiq səbəbləri araşdırılır.

Qeyd edək ki, hadisə Əsəd Əhmədov küçəsi 41 ünvanında çoxmərtəbəli yaşayış binasının 8-ci mərtəbəsində baş verib.

Yanğından mühafizə bölmələri və Xüsusi Riskli Xilasetmə Xidmətinin müvafiq xilasetmə qüvvələri yanğın baş verdiyi ünvana cəlb olunub. Alov iki otaqlı evi əhatə edib.