Bakıdakı yanğın və onunla mübarizədəki səhlənkarlıq

Bu gün paytaxtın Binəqədi rayonunda öz örtüyü alışan çoxmərtəbəli yaşayış binasında son məlumata görə 4 vətəndaşımız faciəli şəkildə həlak olub.

Vəzifəli şəxslərin səhlənkarlığı, əlaqədar orqanların hadisəyə passiv reaksiyası 4 can aldı. Yaralıların sayı dəqiqləşdirilir.

Yanğın başlayandan onunla mübarizə aparmaq istəyən FHN əməkdaşlarının vurduğu su nə təəssüf ki, yalnız binanın 4-cü mərtəbəsinə çatdı. Binanın sonuncu mərtəbəsindən sağ qalan 2 şəxsin camaata çarəsiz şəkildə əl etməsi, ürək parçalayan səhnələrdən idi...

FHN-nin ən böyük yanğınsöndürən maşını hadisə yerinə gəlsə də, onun da suyu 5-ci mərtəbədən yuxarıya çatmadı.

Hadisədən təxminən bir saat sonra yanğın baş ərazinin üzərində FHN-nin iki helikopteri dövrə vurmağa başladı. Kursu götürməyindən pilotlarının naşılığı o saat hiss olunan helikoperlərin binaya yuxarıdan tökmək istədikləri su hədəfə çatmadı. Ya su binaya çatmamış boşaldı, ya da helikopter binanın üstündən keçdikdən sonra su ətrafa yığışanların üstünə töküldü.

Dörd tərəfdən binanın 5-ci mırtəbəsinə qədər hündürlüyü islatmaqdan başqa heç nəyə gücləri çamayan FHN əməkdaşlırının binanın söndürülməsindəki rolu isə demək olar ki, sıfıra bərabər oldu.

Ətraf binaların sakinləri də təlaş içərisində küçəyə qaçmış, yanğını qorxu dolu baxışları ilə izləyirdilər. Çünki yaşadıqları binanın da üzlüyü adi, tez alışan sintetik penoplastla
üzlənmişdi. Apardığımız qısa araşdırmadan sonra niyə məhz Binəqədi rayonundakı binaların bu tez alışan materialla üzləndiyi haqqında maraqlı məlumatlar əldə etdik. Bu haqda növbəti materiallarımızda oxucularımıza geniş və təfsilatlı məlumat verəcəyik.

İndi isə keçək hadisə yerinə gəlmiş vəzifəli məmurların açıqlamalarına. Hadisə yerinə gəlmiş baş prokuror Zakir Qaralovun hadisə ilə ilkin tanışlıqdan sonra verdiyi bəyanat isə bundan ibarət oldu:

"Yanğına səbəb binanın keyfiyyətsiz üz örtüyü olub".

Hadisənin gedişini izləyirik və oxucularımıza bu haqda ətraflı məlumat verəcəyik.

Ölkə.az