Bıçaqlanma olan məktəb: "Pəncərədən içəri girib, valideyn nəzarəti yoxdur"

Məlum olduğu kimi, Bakıda məktəbdə şagirdlər arasında bıçaqlanma hadisəsi baş verib.

Hadisə Xəzər rayonu, Binə qəsəbəsində yerləşən 218 saylı orta məktəbdə qeydə alınıb.
Məktəbin şagirdi, 2007-ci il təvəllüdlü oğlan münaqişə zəminində 2008-ci il təvəllüdlü digər şagirdə bıçaqla xəsarətlər yetirib. Qol və bud nahiyəsindən xəsarətlər alan şagird xəstəxanaya aparılıb və ona tibbi yardım göstərilib.

Hadisəni törətməkdə şübhəli bilinən məktəbli saxlanılıb.

218 saylı orta məktəbin direktor müavini Mirismayıl Vahabov  "Ölkə.Az"a açıqlamasında bildirib ki, hadisəni törədən şagird həmin gün dərsdə olmayıb:

"Sonradan o, məktəbə pəncərədən daxil olub. Həmin şagirdlər əvvəldən bir-birilərini tanıyıblar. Onlar arasında mübahisə yaranıb. Nəticədə məktəbin sanitar qovşağında 9-cu sinif şagirdi məktəb yoldaşına xəsarət yetirib.

Hadisəni törədən şagird çox narahat uşaqdır. Uşağa valideyn nəzarəti yoxdur. Hadisədən sonra biz məktəbə Təcili Tibbi Yardım da çağırdıq. Faktla bağlı pois araşdırma aparır".

Natiq
Ölkə.Az