Azərbaycanın qaz kəmərindəki partlayışla bağlı son xəbər
Türkiyə ərazisində PKK-nın Bakı-Tiflis-Ərzurum-Qars boru kəmərini partlatmasından sonra Ankara ehtiyatlanmağa başlayıb. Bu, həm də Azərbaycanın narahatlığı deməkdir. Türkiyə diqqəti həm də ərazisindən keçən neft və qaz boru kəmərlərinin mühafizəsinin gücləndirilməsi üzərində cəmləyib.
Partlayış baş verən ərazidə hazırda təmir-bərpa işləri aparılır. Azərbaycanın Qarsdakı konsulu Ayxan Süleymanlının sözlərinə görə, hadisə bölgədə terror aktı kimi qiymətləndirilir:
“Baş vermiş partlayışla bağlı məlumat əldə etmək üçün Qars vilayətinə müraciət etdik. Onların bizə verdiyi yazılı məlumatda qeyd edilir ki, partlayış məhz PKK-a tərəfindən həyata keçirilib. Nəticədə, BOTAŞ-ın əlaqədar qurumları qaz axımını dərhal kəsiblər. Artıq BOTAŞ ərazidə təmir-bərpa işlərinə start verib”.
2007-ci ildən istifadəyə verilən Bakı-Tiflis-Ərzurum boru xəttinin Türkiyədən keçən hissəsində bu, ilk hadisə deyil. Üç il əvvəl eyni ərazidə belə hadisə baş vermişdi və həmin vaxt Azərbaycan qazının nəqli tamamilə dayanmışdı.
Doğrudur, bu dəfə xoş təsadüfdən bir gün əvvəl təmirlə bağlı qazın verilişi dayanmışdı. Bu səbəbdən ciddi itki baş verməyib. Amma terror aktının həm Türkiyə, həm də Azərbaycan üçün daha böyük fəsadlara səbəb olma ehtimalı böyükdür. Üstəlik, Bakı-Tİflis-Ərzurum qaz kəməri Bakı-Tiflis-Ceyhan neft kəmərinin yaxınlığından keçdiyindən narahatlığa səbəb böyükdür.
Artıq Türkiyə hökuməti ölkə ərazisindəki kəmərlərin mühafizəsinin gücləndirilməsinə başlayıb.
Türkiyənin enerji naziri Taner Yıldız deyib ki, bu məqsədlə silahlı qüvvələr və jandarma ilə birgə tədbirlər planı hazırlanıb. Bu sahədə yüksək texnologiyalardan da geniş istifadə olunacaq.
Qeyd edək ki, Azərbaycan Bakı-Tiflis-Ərzurum boru kəmərinin Türkiyə-Gürcüstan sərhədinə qədər olan hissəsinə cavabdehdir.
Bu səbəbdən də Türkiyədə baş verən bütün insidentlərə görə zərəri bu ölkənin BOTAŞ şirkəti ödəyir. Bunula belə Bakı-Tiflis-Ərzurum kəmərilə istifadəyə verildiyi 2007-ci ildən bəri 30 milyard kubmetrdən artıq “Şahdəniz” qazı daşınıb. (ans)
Ölkə.Az
