Bakıda silsilə oğurluq törədən şəxsə iş kəsildi

Onun üzərindən heroin aşkar edilərək götürülüb.

Bakı Ağır Cinayətlər Məhkəməsində Cəlilabad rayon sakini Əfqan Xudiyevin (1972-ci il təv.) CM-nin 177.2.2 (oğurluq, təkrar törədildikdə), 177.2.3 (oğurluq, qanunsuz olaraq yaşayış sahəsinə daxil olmaqla törədildikdə) və 177.3.2 (oğurluq, külli miqdarda ziyan vurmaqla törədildikdə) maddələri ilə təqsirləndirilməsinə dair cinayət işi üzrə məhkəmə prosesinin baxışı yekunlaşıb.

Əfqan Xudiyev ötən il iyulun 29-da Nəsimi RPİ 22-ci polis bölməsi əməkdaşlarının keçirdikləri əməliyyat tədbirləri nəticəsində tutulub, baxış zamanı onun üzərindən 1 qramdan artıq heroin aşkar edilərək götürülüb. Araşdırma aparılarkən onun oğurluq etdiyi üçün əvvəllər məhkum olunduğu məlum olub. Dindirmə zamanı, o cəzasını çəkib azadlığa çıxandan sonra Bakının Nəsimi və Səbail rayonlarında ev və mağazaları qarət etdiyini bildirib.

Belə ki, o, aprelin 30-da Vidadi küçəsində yaşayan şəhər sakini Namiq Məmmədovun mənzilindən pul və qızıl-zinət əşyaları, mayın 14-nə keçən gecə Elman Cəfərova məxsus, H.Aslanov küçəsində yerləşən ofisdən iki ədəd televizor və noutbuk, mayın 4-də Nəsihət Əliyevə məxsus, R.Behbudov küçəsində yerləşən mağazadan 1000 manat, iyunun 14-nə keçən gecə Nadir Məmmədova məxsus, Nizami küçəsində yerləşən mağazadan eynəklər, disklər, saatlar və mobil telefonlar, iyulun 6-da Z.Əliyeva küçəsində yerləşən, Svetlana Cəfərovaya məxsus gözəllik salonundan 1025 manat və ətriyyat, iyulun 8-nə keçən gecə Ruslan Kərimova məxsus, Nizami küçəsində yerləşən mağazadan 4470 manat və kişi geyimləri, iyulun 12-nə keçən gecə Z.Əliyeva küçəsində yerləşən gözəllik salonundan mis vaza, ətir, bijuteriya və qadın saatı, iyulun 19-da Səbinə Sultanovaya məxsus, H.Aslanov küçəsində yerləşən mağazadan 8325 manat dəyərində qadın geyimləri, iyulun 24-nə keçən gecə Mərdanov qardaşları küçəsində yerləşən, Salyan rayon sakini Elşən Eminova məxsus gözəllik salonundan 3800 manat və 1454 dollar oğurlayıb.

Məhkəmənin hökmü ilə təqsirləndirilən şəxs 9 il müddətinə azadlıqdan məhrumetmə cəzasına məhkum olunub. (oxu.az)

Ölkə.Az