Günahsız tutuldu, bəraət aldı, 62 min manat təzminatını isə ala bilmir

 

Bu barədə saytına Bayram Niyazovun vəkili Ceyhun Yusifov məlumat verib.

 

Vəkilin sözlərinə görə, daha öncə də  İnzibati-İqtisad Məhkəməsinə kompensasiya ilə bağlı müraciət edib.

 

C.Yusifov bundan öncə iddiaçı Bayram Niyazovun cavabdehlərin qanunsuz hərəkətləri nəticəsində fiziki şəxslərə vurulmuş ziyanın ödənilməsinə dair iddia ərizəsi ilə 1 saylı Bakı İnzibati-İqtisadi Məhkəməsinə müraciət etdiyini vurğulayıb: “Bayram Niyazov iddia ərizəsi ilə Səbayel Rayon Məhkəməsinə müraciət edib. Həmin iddiada cavabdeh qismində Daxili İşlər Nazirliyini, Nəqliyyatda Baş Polis İdarəsini və Maliyyə Nazirliyini göstərib. Bayram Niyazov cavabdehlərdən kompensasiya şəklində 12 min 200 manat maddi, 50 min manat da mənəvi zərər, yəni cəmi 62 min 200 manat pulun ona ödənilməsi barədə qətnamə qəbul edilməsini məhkəmədən xahiş edib”.

 

Vəkil bildirir ki, bəraət alan şəxsin təzminat tələbi ilə məhkəməyə müraciət etməsi nadir hallarda baş verir: “Məhkəmə təzminatı təmin edəcəyi təqdirdə bu, istintaq orqanları üçün dərs olacaq və bir də günahsız insanların həbs olunmasına ümumiyyətlə şərait yaratmayacaq. Bunun üçün də məhkəmə ədalətli qərar qəbul etməlidir. Belə olan halda günahsız insanların həbs olunması üçün optimal şərait də az da olsa aradan qalxar”.

 

Daxili İşlər Nazirliyinin nümayəndəsi Əlirza Həbilov prosesdə çıxış edərək iddiaya Nəsimi Rayon Məhkəməsində baxılmasın istəyib. Halbuki vəkil Əlirza Həbilov kompensasiya tələbi 1 saylı Bakı İnzibati-İqtisadi Məhkəməsində baxılarkən də aidiyyəti işi mübahisələndirmiş və vəsatət verərək işə Səbayel Rayon Məhkəməsində baxılmalı olmasını bildirmişdi.

 

“İndi isə yenidən əsassız olaraq aidiyyatın üçüncü şəxs Maliyyə Nazirliyinin yerləşdiyi yer üzrə -  Nəsimi Rayon Məhkəməsində baxılmasını istəyir. Halbuki qanunun tələbinə əsasən aidiyyat yalnız cavabdehlərdən birinin yerləşdiyi yer üzrə ola bilər” - deyə vəkil C.Yusifov bildirir.

 

C.Yusifov kompensasiya almaq hüququ olan şəxsə kompensasiya verilməsinə süni şəkildə maneçilik törədildiyini də deyir: “Onlara verilmiş hüquqlardan sui-istifadə edərək məhkəmə proseslərinin uzadılmasına nail olur və nəticədə iki ilə yaxındır ki, qanunsuz olaraq həbs etdikləri şəxsin kompensasiya almasına maneçilik törədirlər. Səbayel Rayon Məhkəməsinin hakimi Azər Tağıyev isə DİN-in açıq-aşkar ortada olan süründürməçilik və məhkəmə proseslərinin uzadılmasına yönələn hərəkətlərinə göz yumur, DİN-in nümayəndəsini bu əməlinə görə Mülki Ppesessual Məcəllənin tələblərinə uyğun olaraq cəzalandırmayıb. Halbuki bu, yolverilməz bir haldır. Çünki DİN-in şəxsi qanunsuz olaraq törətmədiyi cinayətdə ittiham edərək onun qanunsuz olaraq 2 ilə yaxın həbs etməsi az deyilmiş kimi üstəlik indi həmin şəxsə verilməli olan kompensasiyanın ödənilməsinə imkan vermir. Bu isə (məhkəmə qərarı ilə kompensasiya almaq hüququ olan şəxsin bu hüququnu həyata keçirməsinə süni şəkildə maneçilik törətməsi) düzgün deyil”.

 

Məlumat üçün bildirək ki, Cinayət Məcəlləsinin 234.4.3-cü maddəsi ilə ittiham olunan Bayram Niyazovun məhkəmə istintaqı Gəncə Ağır Cinayətlər Məhkəməsində hakim Elbəyi Allahverdiyevin sədrliyi ilə keçirilib. Prosesdə onun günahsızlığı sübuta yetirilib. Məhkəmə araşdırması zamanı Bayram Niyazovun uşaqlıqdan xəstə olduğu üzə çıxıb.

 

Təqsirləndirilən şəxsin vəkili  Ceyhun Yusifov iş üzrə narkotik vasitələrin tapılması zamanı hal şahidi olmuş Kəramət Məmmədov və Tofiq Hüseynovun narkotiklə bağlı başqa çoxsaylı cinayət işlərində hal şahidi qismində iştirak etmələrini məhkəmədə sübut edib.

 

Vəkilin Gəncə şəhəri Nizami və Kəpəz Rayon məhkəmələrinə, eləcə də Gəncə Ağır Cinayətlər Məhkəməsinə verdiyi sorğulardan məlum olub ki, Bayram Niyazov həbs olunan zaman hal şahidi qismində dəvət edilmiş Kəramət Məmmədov və Tofiq Hüseynov mütəmadi olaraq müxtəlif cinayət işləri üzrə keçirilmiş şəxsi axtarış və götürmə hərəkətləri zamanı da hal şahidi qismində iştirak ediblər.

 

Müdafiə tərəfinin məhkəməyə təqdim etdiyi arayışlarla o da müəyyən olunub ki, hər iki hal şahidi 2011-2013-cü illər ərzində baxılan 27, məhkəmə istintaqı zamanı 2 cinayət işində hal şahidi kimi iştirak ediblər. Kəramət Məmmədov və Tofiq Hüseynov ümumilikdə 29 cinayət işi üzrə hal şahidi olublar.

 

Həmçinin Bayram Niyazovu Gəncə şəhərinə aparan Elşad Məsiyevin polisin təhrikçisi olması müəyyənləşib. Məhkəmə Elşad Məsiyevin polisin təhrikçisi olduğunu, başqa 5 rayonda da belə cinayət işlərində iştirak etdiyini üzə çıxarıb. Hakimlər Bayram Niyazovun həbsində iştirak edən Elşad Məsiyevin polisin təhrikçisi olması nəticəsinə gəliblər. Buna görə də onun və əməliyyatda iştirak edən əməliyyatçıların barəsində xüsusi qərardad çıxarıblar.

 

Eyni zamanda ekspertiza rəyindən məlum olub ki, Bayram Niyazovda tapılan narkotik vasitənin tərkibi digər cinayət işləri üzrə olan narkotik vasitələrin tərkibi ilə eynidir.

 

Vəkil Ceyhun Yusifov virtualaz.org saytına bildirib ki, DİN başçısı Ramil Usubov bütün bu qanunsuzluqlardan xəbərdar deyil. Çünki nazir daim hüququn aliliynə önəm verməklə DİN-in yüksək imicini qoruyub saxlayıb. Lakin nazirliyin Hüquq İdarəsi DİN-in imicinə xələl gətirən süründürməçiliyə yol verir: “Biz bu məsələnin ictimailəşməməsinə çalışaraq DİN-in imicinə xələl gəlməməsini istəyirdik. Lakin Bayram Niyazovun kompensasiya almaq hüququna bu şəkildə maneçilik törədilməsi, qüvvədə olan məhkəmə qərarlarına etinasız yanaşma bizi bu məsələni ictimailəşdirməyə məcbur etdi. Bir daha daxili işlər naziri cənab Ramil Usubova müraciət edirəm və nazirdən müdafiə etdiyim şəxsin pozulmuş hüquqlarının bərpa olunmasına yardım göstərməsini, bu işdə günahkar olanların cəzalandırılmasını və kompensasiya almaq hüququna süni maneələrin aradan qaldırılmasını xahiş edirəm”. (virtualaz.org)