Homoseksual tələbə nazirliyi məhkəməyə verdi

Çində bir tələbə dərsliklərdə homoseksuallığın “anormallıq” kimi təsvir edildiyinə görə təhsil nazirliyini məhkəməyə verib. 

Şen Qiyan adlı tələbə qız nazirliyə qarşı məhkəmə iddiası qaldırmaq fikrinə universitet kitabxanasında bəzi kitablara rast gəldikdən sonra düşüb. Bu kitablardan bəzilərində homoseksualların elektroşokla müalicə oluna biləcəkləri iddia edilirdi.

Sinxua agentliyinin verdiyi məlumata görə məhkəmə bu işi baxılmaq üçün qəbul edib. Məhkəməyə başqa adla ərizə verən xanım Şen sonradan ABŞ mediası ilə öz adından danışıb. O deyib ki, “homoseksuallar onsuz da təzyiq altındadırlar.

Kitabların vurduğu əlavə damğa birbaşa zərər yetirəcək. Nazirlik bu dərsliklərin məzmununa görə məsuliyyət daşımalıdır”.

Quandonq Universitetində oxuyan xanım Şen kitablara özünün seksual oriyentasiyası barədə məlumat əldə etmək üçün baxmışdı.

“Mən elə bilirdim ki, dərsliklər mötəbər sayılmalıdır, - deyib tələbə qız “New York Times” qəzetinə, - Amma bu kitabları oxuyandan sonra məni vahimə basdı. Bundan sonra homoseksual olduğumu etiraf etmək mənim üçün daha da çətin olacaq”.

Çində homoseksuallığın xəstəlik kimi təsnif edilməsi 2001-ci ildən dayandırılıb, lakin hətta bu tarixdən sonra çap olunmuş bəzi dərsliklər də homoseksuallığı xəstəlik kimi təsvir edir.

Ötən il Pekin məhkəməsi “homoseksuallığın dəyişdirilməsi terapiyası” təklif edən klinikaya qarşı tarixi hökm çıxarıb. (qafqazinfo)

Ölkə.Az