Məşhur general qəflətən dünyasını dəyişdi

Gəncə şəhərinin keçmiş polis rəsisi dünyasını dəyişdi

Bu barədə Ölkə.Az-a mərhum generalın yaxınlarından məlumat daxil olub.

Daxili İşlər Nazirliyinin Daxili Təhqiqatlar İdarəsinin rəisi, polis general-mayoru Rasim Musayev bu gün saat 21 radələrində dünyasını dəyişib. Rasim Musayevin bir müddətdir xəstə olduğu, az öncə isə ürəktutmasından dünyasını dəyişdiyi bildirilir.

Musayev Rasim İslam oğlu Azərbaycanda tanınmış generallardan olub. O, Binəqədi Rayon Polis İdarəsi rəisinin birinci müavini, Daxili İşlər Nazirliyi İctimai Təhlükəsizlik İdarəsinin şöbə rəisi, Sabunçu Rayon Polis İdarəsinin 15-ci Polis bölməsinin rəisi, 2005-2007-ci illərdə Cəlilabad Rayon Polis şöbəsinin rəisi, 2007-2013-cü illərdə isə Gəncə Şəhər Polis İdarəsinin (2011-ci ildə Gəncə şəhər Polis İdarəsi Baş Polis İdarəsinə çevrilib) rəisi vəzifələrində çalışıb.

2011-ci ildə Azərbaycan Respublikasının Prezidenti İlham Əliyevin sərəncamı iləona polis general-mayoru ali xüsusi rütbəsi verilib. 

Rasim Musayev xahişi nəzərə alınaraq 2013-cü il yanvarın 21-də Daxili İşlər nazirinin əmri ilə Gəncə Şəhər Baş Polis İdarəsinin rəisi vəzifəsindən azad edilib.

2013-cü ilin fevral ayının 2-də Daxili İşlər Nazirliyinin Daxili Təhqiqatlar İdarəsinin rəisi təyin edilib.

Qeyd edək ki, 2011-ci ildə Gəncə şəhər icra başçısı ilə  yaşadığı konfliktdən sonra ürək xəstəsi olduğu və Gəncədə işdən ayrıldıqdan sonra bir müddət ürəyindən Almaniyada müalicə almışdı.

Ölkə.Az