İki il əvvəl dəmir bazarında törədilən qətl işinə nöqtə qoyuldu

Bakı Apellyasiya Məhkəməsində Əkbər Cəfərovun CM-nin 120.1 (qəsdən adam öldürmə), 126.1 (qəsdən sağlamlığa ağır zərər vurma), Amil Quliyev və Azər Sultanovun CM-nin 221.2.1-ci (xuliqanlıq, bir qrup şəxs tərəfindən törədildikdə) maddələri ilə təqsirləndirilmələrinə dair cinayət işi üzrə məhkəmə prosesi yekunlaşıb.

2013-cü il iyunun 12-si saat 23:30 radələrində Əkbər Cəfərov Biləcəri qəsəbəsində yerləşən dəmir bazarında əmisi Elsevər Cəfərova məxsus metal məmulatların satışı bazasında gözətçilik edib. Bu zaman bazarın yaxınlığında bərbər işləyən Amil Quliyev evindən sərxoş vəziyyətdə çıxıb və dostları ilə görüşmək üçün bazara bitişik olan “Borçalı” kafesinə yollanıb. O, Əkbər Cəfərovun qoruduğu bazanın ərazisindən keçərkən ucadan səs-küy salıb, ünvansız söyüşlər söyüb. 

Əkbər Cəfərov ona mühafizə olunan yerdən keçdiyinə görə Amil Quliyevə irad bildirib, bir daha bazardan keçməməsini tələb edib. Buna görə onların aralarında mübahisə yaranıb. Əkbər Amilin sərxoş olduğunu bilib və telefon nömrəsini alaraq “çıx get, sən sərxoşsan, nə vaxt ayılarsan, sonra söhbət edərik” deyə bildirib.

Amil isə onu dostları ilə hədələyərək “Borçalı” kafesinə gedib. Gecə saat 12 radələrində Əkbərin həmkəndlisi Şəhriyar ona zəng edərək Amil Quliyev və kafedə olan dostlarının onu ağır söyüşlərlə söydüyünü və onu döyməyə gəldiklərini deyib. Şəhriyar Əkbərə özünü qorumağı məsləhət bilib, deyib ki, Amilə mane olmaq istəyib, ancaq onlar ona da xəsarət yetiriblər. Cəfərov Quliyevlə dostlarının onu ağır söyüşlərlə təhqir etmələrinə, mühafizə etdiyi bazara hücum çəkmələrinə və Şəhriyarı döymələrinə görə əsəbiləşib və aralarında olan mübahisəyə aydınlıq gətirmək üçün kafeyə yollanıb.

Onları cəzalandırmaq məqsədilə hasarın kənarından armatur parçası tapıb, kafedən iki nəfərin çıxaraq ona tərəf gəldiyini görüb. Kafenin yaxınlığında söyüş söyərək yaxınlaşan Azər Sultanovla qarşılaşıb. Əkbər əlində olan armaturla Azərin baş nahiyəsinə bir zərbə vurub, bu zaman sonuncunun arxasınca gələn Afiq Soltanov onu ağır söyüşlərlə təhqir edib. Afiqin söyüşlərindən hiddətlənən Əkbər cibindən bıçaq çıxararaq ona bir neçə zərbə vuraraq öldürüb. Daxil olan məlumatla əlaqədar Ə.Cəfərov Binəqədi RPİ 6-cı polis bölməsinin əməkdaşları tərəfindən saxlanılıb və istintaqa təqdim edilib.

Bakı Ağır Cinayətlər Məhkəməsinin hökmü ilə Əkbər Cəfərov 14 il, Amil Quliyev və Azər Sultanovun hər biri 2 il 6 ay müddətinə azadlıqdan məhrum olunublar. 

Hökmdən narazı qalan təqsirləndirilən şəxslər apellyasiya şikayəti veriblər. İşi araşdıran Bakı Apellyasiya Məhkəməsinin qərarı ilə Əkbər Cəfərovun cəzası 13 ilə, digər təqsirləndirilən şəxslərin isə cəzası 1 ilə endirilib. Lakin bundan narazı qalan dövlət ittihamçısı kassasiya protesti verib. 

Ali Məhkəmə Bakı Apellyasiya Məhkəməsinin qərarını ləğv edib və işin yenidən baxılmasına qərar verilib. 

Bu dəfə işə baxan Bakı Apellyasiya Məhkəməsi Bakı Ağır Cinayətlər Məhkəməsinin hökmünü qüvvəsində saxlayıb. (oxu.az)

Ölkə.Az