İnəklərin davasına qarışdı, başına iş gəldi

Şəkidə bədbəxt hadisə baş verib. İnək 82 yaşlı kişini xəstəxanalıq edib.

Şəki Mərkəzi Rayon Xəstəxanasından verilən məlumata görə, rayonun Şəki kəndində 1933-cü il təvəllüdlü Əsabəli Fərəcov adlı kənd sakini inəklərin hücumuna məruz qalıb.

Belə ki, Ə. Fərəcov axşam saatlarında örüşdən qayıdan iribuynuzlu heyvanların dalaşdığını görüb. O, heyvanları ayırmaq istəyərkən inək onu boynuzuna götürərək yerə çırpıb. Bundan sonra həmin inəklər qocanı tapdalayıblar. Xəsarət alan şəxsi dərhal sınıq və əzik xəsarətləri ilə Şəki Mərkəzi rayon Xəstəxanasına çatdırıblar.

Zərərçəkən Əsabəli Fərəcova lazımi tibbi yardım göstərilib, hazırda vəziyyəti kafidir.

Bundan əvvəl də Sabirabadda oxşar hadisə baş vermişdi. Qarağac kənd sakini 1960-ci il təvəllüdlü Şəmsi İsa oğlu İbrahimov şəxsi təsərrüfatına məxsus olan mal - qaranı satmaq üçün Sabirabad şəhərində yerləşən “mal bazarına” aparmış, bazarda sahibinin əlindən çıxaraq qaçan camış onu qaytarmaq istəyən sahibinə ağır xəsarət yetirmişdi. (ans)

Ölkə.Az