Kamran Əliyev: Qəza törədən mikroavtobus "Embawood" şirkətinin fəhlələrini daşıyırdı

Xəbər verdiyimiz kimi Bakı-Sumqayıt yolunda dəhşətli yol qəzası baş verib

Əldə olunan son məlumata görə, qəza nəticəsində 3 nəfər dünyasını dəyişib, 11 nəfər isə yaralanıb. Hadisə yerində olan şahidlərin verdiyi xəbərə görə, qəza törədən maşının sürücüsü içkili vəziyyətdə olub və onun sürücülük vəsiqəsi olmayıb. Həmçinin onun hadisə yerindən qaçdığı da deyilir.

Məsələni aydınlaşdırmaq üçün Ölkə.Az Daxili İşlər Nazirliyi Baş Dövlət Yol Polisi İdarəsi İctimaiyyətlə Əlaqələr şöbəsinin rəisi, polis polkovniki Kamran Əliyevlə əlaqə saxlayıb.

Kamran Əliyev Ölkə.Az-a verdiyi açıqlamada baş verən dəhşətli qəza zamanı 3 nəfərin öldüyü, 11 nəfərin isə yaralandığı xəbərini təsdiqləyib: "Qəza törədən maşın "Embawood" şirkətinin fəhlələrini daşıyıb. Sürücünün içkili olması barədə məlumatımız yoxdur. Onun sürücülük vəsiqəsinin olub-olmaması məsələsi isə araşdırılır".

Səxavət Məmməd
Ölkə.Az