Şəhid evinə basqın edildi, pulu götürüb qaçdılar
Neftçalada şəhid anasına qarşı soyğunçuluq edilib.
Ölkə.az “Qafqazinfo”ya istinadən xəbər verir ki, noyabrın 27-nə keçən gecə şəhid Telman Kəlbiyevin anası Dilşad Kəlbiyevanın evinə naməlum şəxslər daxil olub. Maskalı şəxslər 72 yaşlı qadını hədələyərək onun 800 manat pulunu götürərək qaçıblar.
Zərərçəkmiş qadın həmin məbləği oğlunun ildönümü mərasimi üçün saxladığını bildirib.
DİN-in Mətbuat Xidmətinin Şirvan regional qrupundan bildirib ki, qeyd edilən soyğunçuluq faktı ilə bağlı Neftçala RPŞ-də cinayət işi açılıb. Əməli törədən şəxs və şəxslərin müəyyən edilərək məsuliyyətə cəlb olunması istiqamətində əməliyyat-axtarış tədbirləri davam etdirilir.
Qeyd edək ki, şəhid Telman Kəlbiyevin nəşi həlak olandan xeyli sonra – 26 dekabr 2020-ci il tarixdə tapılmışdı.
