Sulutəpədə keçmiş qonşusunu öldürən şəxsə hökm oxundu
Bakı Ağır Cinayətlər Məhkəməsində Bakı ş. sakini Samir Eynalovun (1984-cü il təv.) CM-nin 120.2.2-ci (xuliqanlıq niyyəti ilə qəsdən adam öldürmə) maddəsi ilə təqsirləndirilməsinə dair cinayət işi üzrə məhkəmə prosesi keçirilib.
Ötən il avqustun 31-də Samir Eynalov əvvəllər kirayə yaşadığı, sonralar isə qayınanası Rəhimə Eynalovanın yaşadığı Binəqədi rayonu, Sulutəpə qəsəbəsi, R.Allahverdiyev küçəsindəki nömrəsiz fərdi evə gəlib. Ora gəlməkdə məqsədi qayınanasının həmin evdən köçməsi ilə əlaqədar kömək etmək olub. Samir ora çatanda, əvvəlcədən ədavətli olduğu və qonşuluqda yaşayan Nizami Nuriyevin həyətdə ona baxıb rişxənd ilə gülməsini görüb, lakin əhəmiyyət vermədən evə keçib.
Qaynı Elnurun evdə olmadığını görən Samir əşyaları daşımaq üçün maşın gətirməyə getməli olduğundan, Nizami ilə qarşılaşa biləcəyi ehtimalını nəzərə alıb, evdən çıxarkən özü ilə bıçaq götürüb və küçəyə çıxıb. Nəzərdə tutduğu “Qazel” markalı avtomaşının olmadığını görüb evə qayıtdıqda, “Sahil” şadlıq evinin arxa hissəsində, gözlənilmədən Nizami Nuriyevlə qarşılaşıb. Sonuncunun təkrar ona baxıb kinayəli gülməsini görüb, yaxınlaşıb onunla söhbət etmək istədiyini deyib. Nuriyev “sən kimsən ki, səninlə söhbət edim” deyib, yerdən götürdüyü daş parçası ilə Samirin sifət və qol nahiyələrinə vurarkən, o dözməyib qisas almaq niyyəti ilə bıçağı çıxarıb Nizamiyə iki zərbə vurub və bununla da onu qəsdən həyatdan məhrum edib.
Təqsirləndirilən şəxs qismində ifadə verən Samir Eynalov göstərib ki, Nizami ilə arasında ədavət 2013-cü ildə yaranıb. Nizaminin bacanağının evində ailəsi ilə kirayə qalıb, sonradan aralarında olan münasibət pisləşdiyindən Nuriyev ona bu evdə qalmayacağını deyib. Nizamiyə ev onun olmadığı halda, onu necə çıxara biləcəyini soruşduqda, o Eynalovu təhqir edib və döyüb. Həmin vaxt qaynı Elnur onları ayırıb. Samir bu barədə polisə şikayət etməyib. Bu hadisədən sonra Eynalov oradan köçüb və bir müddət bacanağı Dəyanətin evində Sumqayıt şəhərində yaşayıb.
O, həmin evdən çıxandan sonra ora qayınanası köçüb və 1 il ərzində Samir Nizami ilə rastlaşmamaq üçün ora getməyib. Sözügedən ev nəmişlik olduğundan 2014-cü ildə Elnur da ordan çıxmaq istəyib və köçəndə, gəlib kömək etməsini xahiş edib.
Nizami ilə rastlaşanda, o sol əli ilə onun yaxasından tutub və üç dəfə daşla xəsarət yetirib. Axırıncı zərbə burnuna dəydikdən sonra, bıçaqla vurub, onu yerə yıxıb. Nizamini öldürmək fikri olmayıb, aralarında ədavət olmasına baxmayaraq, bu dəfə onun qanunsuz hərəkətlərinə dözə bilməyib. Nuriyevin yıxıldığını gördükdən sonra özünü itirib, bıçağı yol tərəfə atıb. Taksiyə minib birbaşa könüllü Binəqədi RPİ 40-cı polis bölməsinə gəlib. Bölmədən növbətçini soruşub və hadisə törətdiyini deyib.
Məhkəmə hesab edib ki, Samir Eynalovun əməli CM-nin 120.2.2-ci maddəsindən 120.1-ci (qəsdən adam öldürmə) maddəsinə tövsif edilsin.
Məhkəmənin hökmü ilə təqsirləndirilən şəxs cəzasını ümumi rejimli cəzaçəkmə müəssisəsində çəkməklə 13 il müddətinə azadlıqdan məhrumetmə cəzasına məhkum olunub. (oxu.az)
Ölkə.Az
