İki qardaşı vəhşicəsinə öldürən şəxs məhkəmə qarşısına çıxarılır

 

Oktyabrın 9-da Bakı Ağır Cinayətlər Məhkəməsində hakim Mail Bayramovun sədrliyi ilə 1985-ci il təvəllüdlü Cahid və 1980-cı il təvəllüdlü Cavid Rəhimov qardaşlarını güllələyərək öldürən 1984-cü il təvəllüdlü Zaur Ənvər oğlu Tərlanovun cinayət işi üzrə məhkəməyə hazırlıq iclası keçiriləcək. Zaur Tərlanov “Standartbank”ın Qaradağ rayonunda yerləşən filialının işçisi olub. Öldürülən qardaşlardan biri isə Dərin Özüllər Zavodunda işləyib. Bu il yanvarın 8-də axşam saatlarında Bakının Qaradağ rayonunun Sahil qəsəbəsində baş verən dəhşətli qətl hadisəsindən sonra olayla bağlı ən müxtəlif  versiyalar ortaya atılıb. Qətlin pul mübahisəsi üstündə, bir qadına görə baş verməsi haqda da fikirlər səsləndirilib. 

 

Zərərçəkmişlərin hüqiqi varislərinin vəkili Ceyhun Yusifovla əlaqə saxlayıb fikirlərini öyrəndik. Vəkil deyib ki, 1 ilə yaxın aparılan ibtidai istintaqın gedişatından narazıdırlar: “73 səhifəlik ittiham aktının yarıdan çoxu 2 əliyalın şəxsi odlu silahla öldürən şəxsin müsbət xarakterizə olunmasına yönəlib. Sanki ittiham tərəfi statusunu dəyişib, müdafiə nitqi hazırlayaraq ittiham aktına köçürüblər.  Zaur Tərlanovdan bir qəhrəman düzəldib məhkəməyə yollayıblar”. 

Vəkil deyir ki, qətldə adı keçən Xanım Aslanovanın barəsində də ittiham aktında reallıqdan uzaq fikirlər yer alıb: “Eyni zamanda hər 2 şəxslə mütəmadi olaraq yaxın münasibətdə olan Xanım Aslanovanı elə təqdim edirlər ki!!! Hadisənin əsas səbəbkarı bu qadındır. Qətlə yetirilən günahsız şəxsləri isə Amerika telefilmlərinin mənfi qəhrəmana çeviriblər. İttiham aktını oxuyandan sonra müstəntiqin və prokurorun Zaur Tərlanovun həbsinə niyə qərar verdikləri anlaşılmır. Elə yazıblar ki, sanki bəy tərifidir. Belə bir formada ittiham aktının tərtib olunması prokurorluq orqanının imicini zədələyir”.

 

C.Yusifov deyir ki, Z.Tərlanovun cinayəti tam araşdırılmayıb: “Qətli törədən şəxs cəmiyyətdə öz üstünlüyünü nümayiş etdirmək istəyib. Bu qətl xüsusi amansızlıqla törədilib. Bir qardaşın gözü qarşısında digər qardaş qətlə yetirilib. Qatil əvvəlcə Cavidi vurub. Cahid güllələrdən yayınmaq istədikdə ona da atəş açıb. Əgər Zaurun Cavidlə hər hansı bir problemi var idisə, Cahidi niyə öldürürdü? Bu adam bütöv bir ailəni məhv edib, gözüyaşlı qoyub. Bu cür amansızlıq edən qatil layiqli cəzasını almalıdır. Ümid edirəm ki, məhkəmə tam və hərtərəfli araşdırma apraraq cinayətin bütün detallarını xırdalıqlarına qədər araşdıracaq və uyğun qərar verəcək”.

Qeyd edək ki, qətldən sonra Baş Prokurorluq məlumat yaymışdı. Məlumatda bildirilirdi: “Yanvarın 8-də saat 17 radələrində Qaradağ rayonu, Sahil qəsəbəsində yaşayan Zaur Tərlanov aralarında yaranmış mübahisə zəminində özünə məxsus “Vinçester” markalı odlu silahdan Sahil qəsəbəsinin girişində yolun kənarında dayanmış “Lexus” markalı avtomobilin içində oturmuş həmin qəsəbə sakinləri Cavid və Cahid Rəhimov qardaşlarına bir neçə dəfə atəş açaraq, onları qəsdən öldürüb, hadisə yerindən qaçıb. Daxil olmuş məlumat əsasında dərhal hadisə yerinə və meyitlərə baxış keçirilib, maddi sübutlar götürülüb və digər zəruri prosessual hərəkətlər yerinə yetirilib. Faktla bağlı Qaradağ rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb. (musavat)