Bakı-Qazax yolunda avtomobil aşdı

Bakı-Qazax magistralının 235-ci kilometrliyində, Ucar rayonu ərazisində ölümlə nəticələnən yol qəzası baş verib.

Ölkə.Az APA-ya istinadla xəbər verir ki, “VAZ-2107” markalı minik maşını yolun təmir gedən hissəsində yüksək sürətlə hərəkətdə olarkən idarəetməni itirib. Nəticədə avtomobil əvvəlcə yol nişanına, sonra BYD markalı minik maşınına çırpılıb, daha sonra isə aşıb.

“VAZ-2107” markalı avtomobilin sürücüsü hadisə yerində dünyasını dəyişib, sərnişini isə xəsarət alıb. BYD markalı avtomobildə xəsarət alan olmayıb.

Faktla bağlı Baş Dövlət Yol Polisi İdarəsinin istintaq və təhqiqat şöbəsində araşdırma aparılır. Ölən və yaralanan şəxslərin kimliyi aydınlaşdırılır. İlkin ehtimala görə, qəzaya “VAZ-2107” markalı avtomobilin sürücüsünün sürət həddini aşması səbəb olub.

**********

Bakı-Qazax yolunun Ucar rayon ərazisindən keçən hissəsində baş verən yol qəzasında ölən və xəsarət alanların kimliyi məlum olub.

Balakən rayon sakini, 1991-ci il təvəllüdlü Qarayev Bəkir Nizami oğlu hadisə nəticəsində aldığı xəsarətlərdən dünyasını dəyişib. Onun həmyerlisi və həmyaşıdı Mamedov Namiq Nizami oğlu isə bədən xəsarətləri ilə Ucar Rayon Mərkəzi Xəstəxanasına yerləşdirilib.

Ölkə.Az