Bakıda yaşayış binasında yanğın: 15 nəfər xəstəxanaya yerləşdirilib- YENİLƏNİB
Nərimanov rayonunda Həsən Əliyev küçəsində 16 mərtəbəli yaşayış binasında baş verən yanğın nəticəsində yüngül xəsarətlərlə 15 nəfər Kliniki Tibbi Mərkəzin Toksikologiya şöbəsinə hospitalizasiya olunub, 1 nəfərə isə yerində tibbi yardım göstərilib.
Bu barədə Tibbi Ərazi Bölmələrini İdarəetmə Birliyindən (TƏBİB) məlumat verilib.
Yanğın nəticəsində hadisə yerinə dərhal 13 təcili yardım briqadası cəlb olunub.
***
Nərimanov rayonunda 16 mərtəbəli yaşayış binasında baş verən yanğın nəticəsində 15-i uşaq olmaqla ümumilikdə 50 sakin təxliyə edilib.
APA xəbər verir ki, bu barədə FHN DYMX Yanğsöndürmə Qərargahının rəis müavini, polkovnik-leytenant Taleh Babayev məlumat verib.
“Hazırda yanğın söndürülüb. Yanıq xəsarəti alanlarla bağlı hər hansı məlumat daxil olmayıb. Təcili tibbi yardım əməkdaşları tüstüdən zəhərlənənlərə yerində yardım göstərib. Yanğının baş vermə səbəbləri araşdırılır”, - Taleh Babayev nümayəndəsi bildirib.
FHN-dən qeyd olunub ki, 16 mərtəbəli yaşayış binasında şaxta boyunca 30 p.m elektrik naqilləri yanıb.
***
Bakıda yaşayış binasında baş verən yanğın söndürülüb.
“Ölkə.az” xəbər verir ki, bu barədə ölkənin Fövqəladə Hallar Nazirliyi məlumat yayıb.
Bildirilib ki, Bakı şəhəri, Nərimanov rayonu, Həsən Əliyev küçəsində yaşayış binasında yanğın baş verib və dərhal əraziyə Fövqəladə Hallar Nazirliyi Dövlət Yanğından Mühafizə Xidməti, Xüsusi Riskli Xilasetmə Xidməti və Bakı Regional Mərkəzinin qüvvələri cəlb olunub.
Binanın elektrik şaxtasında baş vermiş yanğın genişlənməsinə imkan verilmədən qısa müddətdə söndürülüb.
Təhlükəsizlik tədbirləri çərçivəsində FHN-in qüvvələri tərəfindən bina sakinləri təxliyə olunub.
***
Bakı şəhəri, Nərimanov rayonu, Həsən Əliyev küçəsində yaşayış binasında yanğın başlayıb.
"Ölkə.az" xəbər verir ki, bu barədə məlumat Fövqəladə Hallar Nazirliyinin (FHN) "112" qaynar telefon xəttinə daxil olub.
Məlumatla əlaqədar FHN-nin müvafiq xilasetmə qüvvələri çağırış üzrə cəlb olunublar. Hazırda yanğınsöndürmə işləri həyata keçirilir.
Nəqliyyatı İntellektual İdarəetmə Mərkəzindən "Report"a bildirilib ki, artıq Sabit Rəhman küçəsi ilə Xan Şuşinski küçəsinin kəsişmədə, yaşayış binasında baş verən yanğın səbəbindən, Həsən Əliyev küçəsinin kəsişməsindən Səməd Vurğun küçəsinə giriş məhdudlaşdırılıb.
