Balıq satmaq üstündə dava

Yevlax rayonunda Kəlbəcərdən olan məcburi köçkün Niyaməddin İsayev tanıdığı şəxs tərəfindən küt alətlə vurulub.

Aldığı zərbədən huşunu itirən zərərçəkən xəstəxanaya yerləşdirilib.

Bildirildiyinə görə, hadisəyə səbəb pərakəndə balıq satışı ilə məşğul olan şəxslər arasında yaranan narazılıqdır. Belə ki, İkram adlı şəxs Niyaməddin İsayev kafedə olarkən onun yanına gəlib. O, Niyaməddindən özünün də balıq satdığı Bakı-Qazax magistral avtomobil yolunun kənarında bir daha balıq satmamasını istəyib. Bundan sonra gərginləşən vəziyyət Niyaməddinin İkram tərəfindən başına küt alətlə vurulması ilə nəticələnib.

Xəsarət alan Niyaməddin İsayevə qapalı kəllə-beyin travması və beyin silkələnməsi diaqnozu qoyulub.

Faktla bağlı Yevlax Rayon Polis Şöbəsinin İstintaq Bölməsində araşdırmalar aparılır. (Kəpəz TV)

Ölkə.Az