Qəzada ölən 22 yaşlı Tofiq tələbə imiş - FOTO

Xəbər verdiyimiz kimi, mayın 16-na keçən gecə Bakının Binəqədi rayonunun Goradil qəsəbəsində ağır yol qəzası baş verib.

“Qafqazinfo”nun məlumatına görə, ağır qəzada həyatını itirən 22 yaşlı Tofiq Həsənov tələbə imiş. O, Azərbaycan Dillər Universitetinin (ADU) Beynəlxalq münasibətlər və Regionşünaslıq fakültəsinin IV kursunda təhsil alırmış.

Qeyd edək ki, saat 01 radələrində 1999-cu il təvəllüdlü Məmmədov Piruz İsa oğlunun idarə etdiyi “Mercedes Benz C 320” markalı avtomobil yol kənarındakı evin daş hasarına çırpılıb. Nəticədə ön oturacaqda əyləşmiş sərnişin 2002-ci il təvəllüdlü Həsənov Tofiq Azər oğlu aldığı xəsarətlərdən hadisə yerində vəfat edib.

Sürücü P.Məmmədov və digər sərnişinlər - 1998-ci il təvəllüdlü Piriyev Orxan Fariz oğlu və 1996-cı ildə anadan olmuş Aslanov Allahverdi Sabir oğlu müxtəlif dərəcəli bədən xəsarətləri alıb.

Faktla bağlı Binəqədi RPİ-də cinayət işi başlanılıb.

Qəzaya düşən 4 gənc dost olublar.