Kameradakılar protokollarla uyğun gəlmir
Bu gün Bakı Ağır Cinayətlər Məhkəməsində bu ilin aprelin 22-də “Avropa” otelinin idman zalında öldürülən “Zaminbank”ın Nəsimi filialının müdiri Azər Məmmədovun qətlə yetirilməsində təqsirləndirilən Mövlud Səfərov və Sənan Quliyevin cinayət işi üzrə məhkəmə prosesi davam etdirilib.
Hakim Səbuhi Hüseynovun sədrliyi ilə keçirilən prosesdə sübutların tədqiqi mərhələsi keçirilib.
Dövlət ittihamçısı çıxış edərək bildirib ki, sənədlər elan edilmiş hesab edilsin.
Mövlud Səfərovun vəkili Cavid Rzazadə etiraz edərək deyib ki, ötən prosesdə hadisəni əks etdirən videoya baxış zamanı zərərçəkənlərin və şahidlərinin iştirakı ilə bağlı verdiyi vəsatət təmin edilib: “Bugünkü iclasda isə onların heç biri iştirak etmir. Əgər sənədlər elan edilmiş hesab edilsə, birbaşa video baxışına keçiriləcək. Xahiş edirəm, məhkəmə qəbul etdiyi vəsatəti təmin etsin, sonra proses davam etdirilsin”.
Hakim Səbuhi Hüseynov bildirib ki, videoya ümumi baxış zamanı həmin şəxslərin iştirakı təmin ediləcək.
Cavid Rzazadə vəsatət verərək hadisə yerinə baxış protokolunda hal şahidi kimi tanınan otelin ofisiantlarının məhkəməyə dəvət edilib dindirilməsini istəyib: “Baxış protokolunda kameralarla bağlı heç nə yazılmayıb. Hal şahidləri bu barədə suallara cavab verməlidir”.
Prokuror vəsatətə etiraz edərək bildirib ki, həmin şəxslərin çağırılmasına ehtiyac yoxdu: “Söz oyununa son qoyulsun. Hal şahidi nə bilsin ki, harda kamera olub. Həmçinin, hələ protokol tədqiq edilməyib. Protokola baxış keçirilsin, görək orda nə yazılıb. Sonra müdafiə tərəfi öz vəsatətini verər. Xahiş edirəm, vəsatət təmin edilməsin”.
Məhkəmə kollegiyası yerində müşavirə edərək qərar verir ki, hazırda sübutların tədqiq edilməsi mərhələsi olduğundan vəsatət baxılmamış saxlanılıb.
Bundan sonra hakimlər kollegiyası məhkəmə tərəflərinə müraciət edərək sənədlərin elan edilmiş hesab edilməsi barədə razılıq verib-vermədiklərini soruşub: “Tərəflər cinayət işinin materialları ilə, sübut kimi sənədlərlə də tanış olublar. Sənədləri məhkəmədə elan etməyə ehtiyac var?”
Cavid Rzazadə bununla razılaşmadığını bildirib: “Hakimlər də, dövlət itithamçısı da, vəkillər də sənədlərlə tanış olublar deyə tədqiq etməməliyik? Sübutların tədqiqi mərhələsində sənədlər tədqiq olunmalıdır. Əks halda elan olunmamış sayılmalıdır”.
Bundan sonra müdafiə tərəfinin qeyd etdiyi xüsusi hissələr elan olunub.
İdman zalının parametrləri ilə bağlı hissə elan olunub. Bildirilib ki, protokolda foyenin giriş qapısı ilə qeydiyyat stolu arasındakı məsafə 4 metrdir.
Zərərçəkən şəxslər barəsində verilən ekspertiza rəyi elan edilib. Qeyd olunub ki, Ceyhun Nağıyevin və Ruslan Əfəndiyevin vəziyyəti yüngül, Sənan Quliyev az ağır, mərhum Azər Məmmədovun vəziyyəti iki ədəd bıçaq zərbəsinə görə az ağır, bir ədəd qoltuqaltına dəyən bıçaq zərbəsinə görə yüngün qiymətləndirilib.
Vəkil Cavid Rzazadə hadisəni əks etdirən videoya baxış protokolunda qeyd olunanlara münasibət bildirərək həmin sənədin sübutlar siyahısından çıxarılmasını istəyib: “Müstəntiq protokolda səhvlərə yol verib və məlumatları təhrif edib. Bu təhriflər də məhkəmədə zərərçəkənlərin və şahidlərin ifadələri zamanı sübuta yetirildi. Belə ki, protokolda qeyd olunub ki, “Saat 20:26:07 saniyədə Mövlud Səfərov əlindəki salafan torba, Sənan Quliyev isə əlindəki qara rəngli çanta ilə Azər Məmmədov və digər şəxslərlə itələşmə vəziyyətində zalın dəhlizindən qeydiyyat-nəzarət yeri istiqamətinə çıxmaları, onların arxaları ilə isə 3 nəfər şəxsin - Ruslan Əfəndiyev, Emin Həsənov və Ceyhun Nağıyevin hərəkət etmələri görünür”.
Halbuki, Sənan Quliyevlə Mövlud Səfərov hər hansı bir şəxslə, o cümlədən Azər Məmmədovla itələşmə vəziyyətində olmayıb. Videodan açıq-aşkar görünür ki, Sənan Quliyevlə Mövlud Səfərov arxa-arxaya geri çəkilirlər və bu zaman onlara doğru Ruslan, onun arxasınca Azər, sonra Ceyhun və sonda Emin irəliləyirlər, Sənanla Mövluda çatanda isə Ruslan ilk növbədə yumruqla Mövludun üzərinə hücum edir, sonra Azər isə Sənana yumruq atır.
Bundan başqa, protokolda yenə qeyd edilib ki, “Saat 20:26:17 saniyədə dalaşanlar video kamera qarşısında görünürlər, Azər Məmmədovun Sənan Quliyev və Mövlud Səfərovla əlbəyaxa olması, Ruslan Əfəndiyevin bıçaq zərbəsi alaraq dəhlizə idman zalı istiqamətinə qaçması görünür. Saat 20:26:24 saniyədə Sənan Quliyev əlindəki bıçaqla Azər Məmmədov istiqamətində bıçaq zərbələri endirməsi görünür və sonra ani olaraq Mövlud Səfərov və Sənan Quliyevin oranı tərk edərək qaçmaları görünür”.
Protokol bu hissədə tamamilə təhrif edilib, hadisənin protokolda bu cür əks etdirilməsi müstəntiq Cavid Abbasovun təxəyyülünün məhsuludur. Belə ki, protokoldan görünür ki, guya birinci Ruslan Əfəndiyevə bıçaq zərbəsi endirilib, sonra isə Azər Məmmədov vurulub. Halbuki, məhkəmə istintaqı zamanı ifadə vermiş zərərçəkmiş və şahidlərin ifadələrindən, habelə videogörüntülərdən bilavasitə müəyyən edilir ki, ilk növbədə Ceyhun Nağıyev, sonra Azər Məmmədov və ən sonda Ruslan Əfəndiyevə xəsarət yetirilib.
Bütün bu hallar onu deməyə əsas verir ki, “kompyüter texnikasında kompakt diskə baxış keçirilməsi barədə” 30 iyun 2015-ci il tarixli protokol sübut kimi qiymətləndirilə bilməz və həmin protokol müstəntiqin fantaziyasının məhsuludur. Bu səbəbdən məhkəməyə şifahi vəsatət verərək protokolun sübutlar siyahısından xaric edilməsini xahiş edirik”.
Zərərçəkənin hüquqi varisinin nümayəndəsi Samir İsayev müdaxilə edərək etiraz edir və bildirir ki, vəkil artıq məhkəmə çıxışına başlayıb.
Buna görə hakimlər kollegiyası Cavid Rzazadəyə vəsatət verməyə icazə verməyiblər. Hakim Səbuhi Hüseynov qeyd edib ki, vəsatətlər bütün sənədlər elan edildikdən sonra verilə bilər.
Bundan sonra maddi sübutların tədqiqi ilə bağlı ekspertiza rəyi, Mövlud Səfərov barədə ambulator psixiatrik ekspertizanın rəyi, Sənan Quliyevlə bağlı tibbi sənədlər elan edilib.
Mövlud Səfərovun vəkili şifahi vəsatət verərək müdafiə etdiyi şəxsin həkimi olan psixiatrın məhkəməyə çağırılmasını və dindirilməsini istəyib.
Dövlət ittihamçısı buna etiraz edib: “Əgər müdafiə tərəfi təqsirləndirilən şəxslərin hadisəni törədən zaman anlaqlı olub-olmamasını aydınlaşdırmaq istəyirsə, bununla bağlı yazılı vəsatət versin. Yoxsa həkim burda gəlib nə danışacaq ki? Bütün bunlar sadəcə məhkəmə prosesini süni şəkildə uzatmaq deməkdir. Biz hər dəfə bura gəlib getməyə görə xərc çəkirik. Məhkəməni lazımsız yerə uzatmaq lazım deyil. Xahiş edirik, vəsatət təmin edilməsin".
Hakimlər kollegiyası yerində qərar verərək bildirib ki, cinayət işində eksper rəyi olduğu üçün həkimin məhkəməyə çağırılmasına ehtiyac yoxdur. Vəsatətə təmin edilməyib.
Məhkəmə prosesi noyabrın 3-də davam etdiriləcək.
Xatırladaq ki, bu il aprelin 21-də otelin nəzdində yerləşən idman zalında münaqişə zəminində Bakı şəhər sakinləri, 1985-ci il təvəllüdlü Azər Aydın oğlu Məmmədov ürək nahiyəsindən 3 bıçaq xəsarəti və 1971-ci il təvəllüdlü Ruslan Zakir oğlu Əfəndiyev döş qəfəsinin ön səthinin sol tərəfindən kəsilmiş 2 bıçaq xəsarəti alıb. A. Məmmədov aldığı bıçaq xəsarətdən hadisə yerində ölüb, R. Əfəndiyev isə xəstəxanaya yerləşdirilib və həkimlərin səyi nəticəsində həyatını xilas etmək mümkün olub. Hadisəni törədən Bakı şəhər sakini, 1987-ci il təvəllüdlü Sənan Təvəkkül oğlu Quliyev və onun dostu Mövlud Səfərov tutulub.
S.Quliyev və M.Səfərov Cinayət Məcəlləsinin 221.2.1, 221.2.2, 120.2.1, 120.2.2, 120.2.3, 29, 120.2.1, 29, 120.2.2, 29, 120.2.3 və 29,120.2.7-ci maddələri ilə ittiham ediliblər. (qafqazinfo)
Ölkə.Az
