Məhkəmə “Sirab Satış və Dağıtım MMC” ilə bağlı işə xitam verdi

Cəlilabad Rayon Məhkəməsində “Sirab Satış və Dağıtım” MMC barəsində Dövlət Reklam Agentliyi Lənkəran Regional Reklam İdarəsindən daxil olmuş Azərbaycan Respublikası İnzibati Xətalar Məcəlləsinin 428.7.3-cü maddəsi ilə olan inzibati xətaya dair iş materiallarına açıq məhkəmə iclasında baxılıb.

Ölkə.Az xəbər verir ki, 5 avqustda hakim Vüsal Cəbrayılovun sədrliyi ilə keçirilən iclasda məhkəmə qərar qəbul edib.

Məhkəmə “Sirab Satış və Dağıtım” MMC barəsində ADRA-nın Lənkəran Regional Reklam İdarəsi tərəfindən tərtib edilmiş 10 inzibati xəta haqqında protokola əsasən İXM-nin 428.7.3-cü maddəsi ilə başlanmış inzibati xətaya dair iş üzrə icraata xitam verib.

Xatırladaq ki, “Sirab Satış və Dağıtım MMC”yə açıq məkanda reklam haqqında müvafiq qurum tərəfindən İnzibati Xətalar Məcəlləsinin 428.7.3-ci maddəsinə cərimə protokolu tərtib edilib.

Daha sonra protokol baxılması üçün Cəlilabad Rayon Məhkəməsinə göndərilib və iş hakim Vüsal Cəbrayılovun icraatına verilib.

Protokola əsasən, müvafiq icra hakimiyyəti orqanının yaratdığı qurumun açıq məkanda reklam sahəsində (o cümlədən tikintisinə icazə tələb olunmayan açıq məkanda reklam qurğularının quraşdırılması və sökülməsi sahəsində) nəzarətin həyata keçirilməsi çərçivəsində verdiyi yazılı göstərişlərin və qərarların (bu Məcəllənin 394.0.7-ci maddəsində nəzərdə tutulmuş hallar istisna olmaqla) vaxtında və tam yerinə yetirilməməsinə görə fiziki şəxslər üç yüz manatdan beş yüz manatadək məbləğdə, vəzifəli şəxslər min beş yüz manatdan iki min beş yüz manatadək məbləğdə, hüquqi şəxslər beş min manatdan on min manatadək məbləğdə cərimə ediləcəkdi.