MilliÖn-ün “milli” kələyi

 

Əməkdaşlarımızdan biri oktyabrın 29-da 7-ci mikrorayon ərazisində - "Çudo Peçka"nın qarşısında qoyulan MilliÖn aparatından mobil telefonuna ödəniş etmək istəyib: "Nömrəni yığdım, yaşıl işıq yandı, pulu aparata daxil etdim. Lakin 10 manatlıq əskinaz aparatın kassasına deyil, boşluğa düşdü. Dərhal bu barədə *0010 nömrəsinə yığıb MilliÖn şəbəkəsinin qaynar xəttinə məlumat verdim. Bildirdilər ki, qısa müddətdə pulu boşluqdan çıxarıb sizə məlumat verəcəyik. 3-4 gün gözləsəm də, heç bir məlumat verilmədi. Daha sonra noyabrın 5-də onlarla yenidən əlaqə saxladım. Dedilər ki, sizə 6 iş günü ərzində məlumat veriləcək, ödənişiniz həyata keçiriləcək. Məsələ heç də 10 manatda deyil, sadəcə vətəndaşlarla bu cür etinasız davranış xidmət sektoru üçün yolverilməzdir. Həmçinin, məlum oldu ki, ödəniş terminallarında pul qoyulan hissə etibarsızdır, xeyli sayda insanın ödədiyi pul boşluğa daxil olub.

 

Orada yaşıl işığın altında boşluq var. Mənə o da bəlli oldu ki, bu yaxınlarda digər bir əməkdaşımızın da pulu eyni qaydada həmin boşluğa düşüb və onu geri ala bilməyib. Həm də bir jurnalist marağı ilə MilliÖn-un qaynar xəttinə noyabrın 13-də bir daha telefon açdım. Operator bildirdi ki, bəli, sizin müraciətiniz araşdırılıb və 10 manatınız aparatın daxilində aşkarlanıb. Soruşdum ki, bəs bu haqda müştəriyə niyə məlumat vermirdiniz? Dedilər vaxtımız olmayıb. Bu absurd cavabdan sonra dedilər ki, qısa müddətdə 10 manatlıq ödəniş telefonunuza yüklənəcək.

 

Lakin onun üzərindən də 3 gün vaxt keçir, ödəniş həyata keçirilməyib. Belə başa düşülür ki, vətəndaş bu məsələdə prinsipiallıq göstərsə də, MilliÖn-ün əməkdaşları "milli" kələyi başa çatdırmaqda sonadək israrlıdırlar. Faktiki olaraq 18 gün ərzində israrlı tələbimizə baxmayaraq, aparata düşmüş pulu almaq mümkün olmur".