Tanışını Qobuda öldürüb, Pirşağıda basdıran şəxslərə hökm oxundu
Cəsədi avtomobilin yük yerinə qoyaraq Pirşağı qəsəbəsinə gətiriblər.
Bakı Ağır Cinayətlər Məhkəməsində Bakı ş. sakini Vüsal Rəhimov və Fuad Nurməmmədovun CM-nin 120.2.1 (qəsdən adam öldürmə, qabaqcadan əlbir olan bir qrup şəxs tərəfindən törədildikdə), 120.2.4-cü (xüsusi amansızlıqla qəsdən adam öldürmə) və 228.4-cü (qanunsuz olaraq soyuq silahı əldə etmə, satma və ya saxlama) maddələri ilə təqsirləndirilmələrinə dair cinayət işi üzrə məhkəmə prosesi yekunlaşıb.
Ötən il sentyabrın 23-də Bakı ş. sakini Vüsal Rəhimov Binəqədi RPİ 6-cı PB-yə müraciət edərək, Abşeron rayonunun Qobu qəsəbəsində sentyabrın 17-də tanışı, paytaxt sakini Fuad Nurməmmədova məxsus “AzSamand” markalı avtomobildə Qaradağ rayon sakini Rahib Xəlfəyevi (1959-cu il təv.) bıçaqla qətlə yetirib hadisə yerini tərk etməsini, cəsədin isə F.Nurməmmədov tərəfindən Sabunçu rayonunun Pirşağı qəsəbəsi ərazisində basdırılmasını bildirib.
Vüsal Rəhimov saxlanılandan sonra Fuad Nurməmmədovun olduğu yer müəyyən edilib və o tutulub, sonuncunun ifadəsi əsasında meyit aşkar edilərək, məhkəmə-tibbi ekspertiza və patoloji anatomiya birliyinə göndərilib. Faktla əlaqədar Binəqədi rayon prokurorluğunda cinayət işi başlanıb.
İş üzrə dindirilmiş Vüsal Rəhimov ifadəsində göstərib ki, həmin gün R.Xəlfəyevi maşında Qobu qəsəbəsinə gətirib və sonuncunun ona olan pul borcu ilə əlaqədar aralarında mübahisə yaranıb. Baş vermiş münaqişə zamanı Rəhimov Xəlfəyevə bıçaqla xəsarətlər yetirib, nəticədə kəskin qanitirmə sonuncunun ölümünə səbəb olub. Cəsədi avtomobilin yük yerinə qoyaraq birlikdə Pirşağı qəsəbəsinə gətiriblər və orada basdırıblar.
R.Xəlfəyev Qaradağ rayon sakini olub. Onun haqqında sentyabrın 19-dan itkin düşmüş kimi axtarış elan olunub.
Məhkəmə prosesində təqsirləndirilən şəxslər özlərini təqsirli hesab ediblər.
Məhkəmənin hökmü ilə cəzalarını ciddi rejimli cəzaçəkmə müəssisəsində çəkməklə V.Rəhimov 18, F.Nurməmmədov isə 17 il müddətinə azadlıqdan məhrumetmə cəzasına məhkum olunublar. (oxu.az)
Ölkə.Az
