TƏBİB: Tovuzda məktəbdəki tüstülənməyə görə 55 nəfər xəstəxanaya çatdırılıb - Yenilənib

Tovuz rayonu, Aşağı Quşçu kəndində yerləşən məktəbdə şagirdlər arasında dəm qazından kütləvi zəhərlənmə şübhəsilə 55 nəfər Tovuz Rayonu Mərkəzi Xəstəxanasına hospitalizasiya olunub.

Bu barədə TƏBİB-dən məlumat verilib.

Bildirilib ki, zərərçəkənlər Təcili və təxirəsalınmaz tibbi yardım, Reanimasiya, Cərrahiyyə və Yoluxucu xəstəliklər şöbəsinə yerləşdirilib.

Onların hər birinə zəruri tibbi xidmətlər göstərilir.

***
Aşağı Quşçu Ayrım kəndinin bələdiyyə sədri məktəbdə baş verən zəhərlənmə hadisəsi ilə bağlı 20 nəfərin zəhərlənməsi ilə bağlı yayılan məlumatı təkzib edib.

Ölkə.az xəbər verir ki, bələdiyyə sədri Tofiq Hüseynov Oxu.Az-a açıqlamasında bildirib ki, 10 uşaq tüstüdən zəhərlənib.

"20 deyil, 10 uşaqdır. Elə də ciddi məsələ deyil",- deyə bələdiyyə sədri bildirib.

***
Tovuz rayonu Aşağı Quşçu kənd orta məktəbində 15-dən çox şagird zəhərlənib.

Ölkə.az-ın "Report"a istinadən məlumatına görə, zərərçəkənlər xəstəxanaya çatdırılıb.

Onların yanacaq sobasının tüstüsündən zəhərləndiyi bildirilib.

Faktla bağlı araşdırma aparılır.