5 manat 80 qəpik borca görə adam bıçaqlayan şəxsə hökm oxundu

Bakı Ağır Cinayətlər Məhkəməsində Siyəzən şəhər sakini Samiq İlyasovun (1992-ci il təv.) CM-nin 126.1-ci (qəsdən sağlamlığa ağır zərər vurma) maddəsi ilə təqsirləndirilməsinə dair cinayət işi üzrə məhkəmə prosesinin baxışı yekunlaşıb.

Oxu.Az xəbər verir ki, bu il avqustun 12-də gecə saat 1 radələrində Samiq İlyasov Seyran Babayevə məxsus Siyəzən şəhəri, Ş.Əliyev küçəsində yerləşən mağazanın qarşısından keçəndə, sonuncu ondan 5 manat 80 qəpik borcunu istəyib, o isə hazırda pulunun olmadığını, pulu olan kimi onun pulunu verəcəyini deyib. 

Buna görə S.Babayev onu nalayiq ifadələrlə təhqir edib, Samiq İlyasov isə əsəbləşərək yaşadığı evdən bıçaq götürüb həmin mağazaya gəlib və  oranın qarşısında sonuncunu qəsdən sağ böyüründən vurub. Zərərçəkən sağlamlığa ağır zərər vurmaya aid edilən xəsarətlə Mərkəzi rayon xəstəxanasına çatdırılıb və həkimlərin müdaxiləsi nəticəsində həyatı xilas edilib.

Məhkəmə prosesində Samiq İlyasov ittiham üzrə özünü təqsirli bilərək ifadəsində göstərib ki, onun Seyran Babayevlə münasibəti normal olub.Ailəsinin maddi vəziyyəti ilə bağlı olaraq o, adətən Seyranın mağazasından ərzaq mallarını nisyə alıb. Sonuncu dəfə, avqustun 9-da ordan nisyə pivə, ərzaq malları alıb və sonuncuya 5 manat 80 qəpik borcu qalıb. Ayın 12-də siqaret çəkmək üçün evdən küçəyə çıxıb və piyada Seyranın mağazasına tərəf getib. 

Oranın qarşısına çatdıqdasonuncu ondan borcunu nəyə görə qaytarmadığını soruşub o, sonuncuya yaxınlaşaraq hazırda pulu olmadığını, amma olan kimi, qaytaracağını deyib. Babayev ünvanına söyüş söydüyü üçün, Samiq marketdən aralanıb evə getib və mətbəx bıçağını götürüb geri qayıdıb. Mağazanın içərisinə daxil olanda Seyranın mağazanı bağladığını görüb və sonuncuya yaxınlaşıb "pulun altında qalan oğlan" olmadığını deyib. Ardınca sol əlində tutduğu bıçaqla Seyranın sağ böyür tərəfindən bir zərbə vurub və kəsici aləti mağazanın qarşı tərəfinə tullayıb, yola tərəf gedib. 

Orda tanımadığı bir avtomobili saxlatdırıb, onunla Sumqayıt şəhərində yaşayan nənəsinin evinə yollanıb. Evdə nənəsinə törətdiyi hadisə barədə məlumat verib, səhərisi gün isə polis şöbəsinə gedəcəyini bildirib. Növbəti gün saat 9-da Siyəzənə qayıdıb. Əvvəl Seyranı bıçaqla vurduğu mağazanın qarşısına gəlib və bıçağın orada qaldığını görüb, götürərək, gətirib yaşadığı evin həyətinə tullayıb. Sonra RPŞ-nə gedərək törətdiyi cinayət əməlini etiraf edib.

Zərərçəkən Seyran Babayev bildirib ki, Samiq ona bıçaqla ikinci zərbəni vuranda o, əli ilə həmin zərbənin qarşısını alıb və mağazanın içərisinə qaçıb, sonra isə qardaşına zəng edərək kömək istəyib. O, İlyasova qarşı heç bir şikayət və tələbi olmadığını bildirib.

Məhkəmənin hökmü ilə  təqsirləndirilən şəxs cəzasını ümumi rejimli cəzaçəkmə müəssisəsində çəkməklə 5 il müddətinə azadlıqdan məhrum olunub. 

Ölkə.Az