Qohumunu od vurub yandıran Qobustan sakini 17 il 6 ay cəza aldı

Bakı Ağır Cinayətlər Məhkəməsində Qobustan rayon sakini Vüsal Mirzəliyevin CM-nin 120.2.4-cü (xüsusi amansızlıqla qəsdən adam öldürmə) maddəsi ilə təqsirləndirilməsinə dair cinayət işi üzrə məhkəmə prosesi başa çatıb.

Ötən il iyunun 1-də Qobustan şəhər sakini Taleh Mirzəliyev (1975-ci il təv.) bədən səthinin termiki yanıq xəsarətləri ilə əvvəl Mərkəzi rayon xəstəxanasına çatdırılıb, orada ona ilkin tibbi yardım göstəriləndən sonra, o Bakıdakı xəstəxanalardan birinə yerləşdirilib. 

Aparılmış istintaqla müəyyən edilib ki, axşam saat 18 radələrində Taleh Mirzəliyev Şıxzərli kəndi ərazisində qohumu Vüsal Mirzəliyevlə birlikdə sahədə ot yığarkən, sonuncu hirslənərək, özünün yığdığı otları yandırmaq fikrinə düşüb və avtomobildən benzin qabını götürüb, içindəki yanacağı yerə tökməyə başlayıb. Bunu görən Taleh Mirzəliyev onun qarşısını almağa başlayıb, Vüsalın əlindən həmin qabı alarkən, benzin öz üstünə tökülüb. Bu zaman Vüsal kibriti yandırıb, yığılmış otun üstünə atıb, həmin kibritdən Talehin paltarları yanmağa başlayıb.

Hadisədən bir həftə sonra, iyunun 8-də Taleh Mirzəliyev həkimlərin müdaxiləsinə baxmayaraq vəfat edib. Toplanmış material üzrə Qobustan rayon prokurorluğunda CM-nin 124.1-ci (ehtiyatsızlıqdan adam öldürmə) ibtidai araşdırma başlanıb, lakin istintaqın gedişatında V.Mirzəliyevin əməli CM-nin 120.2.4-cü maddəsinə tövsif edilib. 

Məhkəmənin hökmü ilə V.Mirzəliyev cəzasını ciddi-rejimli cəzaçəkmə müəssisəsində çəkməklə 17 il 6 ay müddətinə azadlıqdan məhrumetmə cəzasına məhkum olunub.  (oxu.az)

Ölkə.Az