Bakıda falçını yazdığı duaya görə öldürdü

Cahangirov ekstrasensdən qısas almaq qərarına gəlib.

Bakı Ağır Cinayətlər Məhkəməsində Goranboy rayon sakini Məhəbbət Cahangirovun (1987-ci il təv.) CM-nin 120.1-ci (qəsdən adam öldürmə) maddəsi ilə təqsirləndirilməsinə dair cinayət işi üzrə məhkəmə prosesi başlayır.

Ötən il martın 14-də Səbail RPİ 9-cu polis bölməsinin əməkdaşları daxil olan məlumat əsasında İçərişəhər ərazisində, Firdovsi küçəsi 5 ünvanında Lerik rayon sakini Tahir Talıbovun (1970-ci il təv.) üzərində çoxsaylı xəsarətləri olan meyitini aşkar ediblər. Araşdırma zamanı məlum olub ki, Talıbov həmin ünvanda mənzili kirayələyib, orada dini xidmətlər, şəfagətirici dualar oxumaqla məşqul olub.

İstintaq-əməliyyat tədbirləri nəticəsində məlum olub ki, cinayəti Goranboy rayonu, Dəliməmmədli şəhər sakini Məhəbbət Cahangirov törədib, şübhəli şəxs yaşadığı rayonda tutularaq istintaqa təqdim olunub.

Cinayət işinin materiallarına görə, “Azəriqaz” İstehsalat Birliyinin Goranboy rayon şöbəsinin hüquqşünası Məhəbbət Cahangirov 2008-ci ildə əsəb xəstəliyinə və başında olan ağrılara görə Tahir Talıbova müraciət edib. Onu müayinə edən T.Talıbov dua yazıb. Həmin duanı gəzdirən Məhəbbət Cahangirov bildirib ki, elə ondan sonra həyatı daha da alt-üst olub. Ağrıları çoxalıb və işində problemlər yaranıb. Bu səbəbdən Məhəbbət Cahangirov ekstrasensdən qısas almaq qərarına gəlib. (oxu.az)

Ölkə.Az