Fəhlələrin çörək pulunu oğurlayan şəxslər tutuldu
Bakı şəhər Baş Polis İdarəsi oğurluqda şübhəli bilinən şəxsləri yaxalayıb.
BPİ-dən Ölkə.Az-a daxil olan məlumata görə, yanvarın 17-ə keçən gecə Qala qəsəbəsi Xaşaxuna bağlar massivində Bakı şəhər sakini Ehtiram Məhərrəmova məxsus mebel sexindən, qapının qıfılını sındırmaqla stol-stul dəsti və təmir alətləri oğurlanıb.
Xəzər RPİ PPXB və 1-ci PB əməkdaşlarının keçirdiyi əməliyyat-axtarış tədbirləri nəticəsində, oğurluqda şübhəli bilinən Qala qəsəbə sakinləri - 1977-ci il təvəllüdlü Nurəddin Səməndərov, 1992-ci il təvəllüdlü Orxan Cəfərov və 1982-ci il təvəllüdlü Faiq Babayev tutulub.
Yanvarın 10-na keçən gecə, Ş.Səmədov küçəsində yerləşən 33 nömrəli poçtdan, pəncərənin dəmir barmaqlığı sındırılmaqla içərisində 110 manat, 200 ABŞ dollar və poçt markaları olan seyf, yanvarın 15-nə keçən gecə, A.Ələsgər küçəsində Müşfiq Hüseynova məxsus mağazadan, qapını sındırmaqla 800 manat və 10.500 manat dəyərində tütün məmulatları və X.Məmmədov küçəsində yerləşən 3 saylı poçtun 123 saylı filialından, pəncərənin dəmir barmaqlığını sındırmaqla müxtəlif regionlardan gəlmiş vətəndaşlara məxsus 100 ədəd bağlama oğurlanıb.
Xətai RPİ 34-cü PB əməkdaşlarının keçirdiyi əməliyyat-axtarış tədbirləri nəticəsində, oğurluqda şübhəli bilinən Bakı şəhər sakinləri - 1994-cü il təvəllüdlü Tamerlan Məmmədov, 1996-cı il təvəllüdlü Zöhrab Məmmədov və Beyləqan rayon sakini 1993-cü il təvəllüdlü Qarakişi Əliyev tutulub.
Yanvarın 14-də Mərdakan qəsəbəsi yeni yaşayış sahəsində fəhlə işləyənlər - Vaqif Talıbovun cibindən qaz kartı, qardaşı Məmmədin cibindən 23, Səlim İbadovun cibindən 27, Rauf Qurbanovun cibindən 95 və Tarverdi Mehdiyevin cibindən 21 manat oğurlanıb.
Xəzər RPİ 1-ci PB əməkdaşlarının keçirdiyi əməliyyat-axtarış tədbirləri nəticəsində, oğurluqda şübhəli bilinən Bakı şəhər sakini, 1979-cu il təvəllüdlü Ramil Kərimov və Balakən rayon sakini 1980-ci il təvəllüdlü Səbuhi İbrahimov tutulub.
Ölkə.Az
