Ucadan danışan tanışını öldürən Cəlilabad sakini 14 il cəza aldı

O, əməlindən peşman olduğunu qeyd edib.

Bakı Ağır Cinayətlər Məhkəməsində Cəlilabad rayon sakini Maarif Mirzəyevin (1980-ci il təv.) CM-nin 120.1-ci (qəsdən adam öldürmə) maddəsi ilə təqsirləndirilməsinə dair cinayət işi üzrə məhkəmə prosesinin baxışı yekunlaşıb.

Ölkə.Az oxu.az-a istinadən xəbər verir ki, ötən il sentyabrın 15-də Nəsimi RPİ 20-ci polis bölməsinin əməkdaşları 3-cü mikrorayon ərazisindəki körpünün yaxınlığındakı məhəllələrdən birində üzərində zorakılıq əlamətləri ilə naməlum kişi meyiti aşkar ediblər.

Hadisə yerinə prokurorluq əməkdaşları və ekspertin iştirakı ilə baxış keçirilib, araşdırma nəticəsində məlum olub ki, ölən şəxs Əhməd Səmədovdur (1974-cü il təv.). Keçirilmiş əməliyyat-axtarış tədbirləri nəticəsində 2 gündən sonra cinayəti törətməkdə şübhəli bilinən Maarif Mirzəyev saxlanılıb. 

İş üzrə təyin olunan məhkəmə-tibbi ekspertizasının rəyinə görə, Ə.Səmədovun ölümünə döş qəfəsinə nüfuz etməklə ürəyi zədələyən yara nəticəsində törənən kəskin qanitirmə səbəb olub. 

İstintaqla müəyyən edilib ki, Maariflə Əhməd günəmuzd fəhlə işləyiblər, hər gün körpünün altında dayanaraq, bu və ya digər sifarişləri yerinə yetiriblər, bununla da çörək pulu qazanıblar.

Həmin gün, işdən sonra onlar iki şüşə araq alıb yaxınlıqdakı məhəllələrdən birində içiblər. Söhbət əsnasında gecə olduğuna görə Maarif Əhmədə deyib ki, ucadan danışıb, söyüş söyməsin, ona görə ki, onların səsinə bina sakinləri eyvana çıxıb, onlara iradlarını bildirə bilərlər.

Bu hal bir neçə dəfə təkrar olandan sonra, spirtli içkinin təsirindən sərxoş olan Səmədov Mirzəyevin sözünü kəsərək, ona deyib ki “sən qorxaqsan, ona görə də iki dəqiqədən bir mənə deyirsən ki, yavaş danış”. 

Bu söz mübahisəyə təkan verib. Maarif əlinə araq şüşəsini götürdükdə, Əhməd kolbasa doğradıqları bıçağa əl atıb. Amma Mirzəyev şüşə ilə Səmədovun başına zərbə endirib, daha sonra bıçağı onun döş qəfəsinə vurub. Hadisədən sonra, o çıxıb, qaldığı evə gedib, tutulmaqdan ehtiyat etdiyi üçün səhərisi gün iş yerinə getməyib. Daha 1 gündən sonra polislər onu tutublar.

Məhkəmə prosesində M.Mirzəyev ittiham üzrə özünü qismən təqsirli hesab edərək bildirib ki, tanışını qəsdən yox, özünü qorumaq məqsədi ilə qətlə yetirib. O, əməlindən peşman olduğunu qeyd edib. 

Məhkəmənin hökmü ilə təqsirləndirilən şəxs cəzasını ciddi-rejimli cəzaçəkmə müəssisəsində çəkməklə 14 il müddətinə azadlıqdan məhrumetmə cəzasına məhkum olunub. 

Ölkə.Az