Sevdiyi qadını öldürüb basdıran şəxsin məhkəməsi başladı
“Yeganənin kiməsə qismət olmasına icazə verə bilmədim”.
Bakı Ağır Cinayətlər Məhkəməsində Şamaxı rayon sakini Vahid Vəliyevin (1971-ci il təv.) CM-nin 120.1-ci (qəsdən adam öldürmə) maddəsi ilə təqsirləndirilməsinə dair cinayət işi üzrə hazırlıq iclası keçirilib.
DİN-in yaydığı məlumata görə, ötən il avqustun 25-də Sumqayıt şəhərində yaşayan Yeganə Mirzəyeva evdən çıxıb və geri qayıtmayıb.
Əməliyyat-axtarış tədbirləri nəticəsində sentyabrın 22-də Abşeron rayonunun Ceyranbatan qəsəbəsinin ərazisində qadının baş nahiyəsində xəsarətləri olan, çürüməyə məruz qalmış meyiti tapılıb.
Polis və prokurorluq orqanları əməkdaşlarının həyata keçirdikləri tədbirləri ilə hadisənin münaqişə zəminində Vahid Vəliyev tərəfindən törədilməsi müəyyən edilib və o, tutulub.
Fakt üzrə şəhər prokurorluğunda cinayət işi başlanıb, istintaq araşdırması zamanı məlum olub ki, mərhum İmişli rayonunda anadan olub. Bir il müddətində Yeganə Mirzəyeva Vahid Vəliyevlə qeyri-rəsmi yaşayıb. Qeyd edək ki, V.Vəliyev ailəli olub.
İş üzrə dindirilən təqsirləndirilən şəxs həmin qadını sevdiyini, başqasına qismət olmasın deyə, onu öldürdüyünü bildirib:
“Yeganənin kiməsə qismət olmasına icazə verə bilmədim”.
O, qadını küt alətlə qətlə yetirib, sonra isə özünə məxsus “VAZ 21099” markalı avtomaşınla Ceyranbatan qəsəbəsinə aparıb, ən hündür təpədə basdırıb.
Onun sözlərinə görə, hər həftə dəfn elədiyi qadının məzarını ziyarət edib.
Hazırlıq iclasında məhkəmənin tərkibi elan edilib və təqsirləndirilən şəxsin anket məlumatları dəqiqləşdirilib.
Məhkəmənin baxışı yanvarın 28-ə təyin edilib. (oxu.az)
