Maşın oğrusu: 10 manata götürdüm, 600 manata satdım
Sumqayıt şəhəri ərazisində yerləşən avtomobil bazarından "VAZ 2107" markalı avtomobil qaçırılıb. Artıq cinayət törədən şəxs saxlanılıb.
Ölkə.Az Region TV-yə istinadən xəbər verir ki, Sumqayıtda yerləşən avtomobil bazarında maşın satan vətəndaşlardan biri polisə müraciət edərək bazara satmağa gətirdiyi VAZ 2107 markalı avtomobilinin yoxa çıxdığını bildirib.
Oğurlanan avtomobil dərhal axtarışa verilib və Göyçay rayonu ərazisində aşkarlanıb. Polis əməkdaşları VAZ 2107-nin Göyçay rayonu, Bəydövül kənd sakini, 26 yaşlı Lətif Kərimov tərəfindən qaçırılmasını müəyyənləşdiriblər.
Eyni əmələ görə, əvvəllər də məhkum olunan şəxsin sözlərinə inansaq, iki ay əvvəl həmin bazarda öz avtomobilini satıb. Avtomobilini satan zaman bazarın zəif mühafizə olunmasını müşahidə edib. Bundan sonra da oradan avtomobil qaçırmaq qərarına gəlib.
Saxlanılan şəxs:
“Gəldim maşın bazarına, bir az gəzdim. Gəzəndə gördüm ki, bir “07”nin qapısı açıqdır. Bazarın “axranasına” yaxınlaşıb soruşdum ki, 721 nömrəli maşının bazara borcu var? Dedi ki, 10 manat borcu var. 10 manatı verib, maşını götürüb çıxdım”.
Dayanacaq haqqını alan mühavizəçi sənəd yoxlamadan Lətif Kərimovun idarə etdiyi “VAZ 2107”-ni çölə buraxıb. O da maşını yaşadığı Göyçaya aparıb.
Saxlanılan şəxs:
“Apardım tanış bir ustaya, 600 manata satdım. Ustaya dedim ki, maşının sənədləri yoxdur. O da soruşdu ki, problem olmaz? Dedim ki, problem olmayacaq”.
Lətif Kərimovdan oğurluq avtomobili alan maşın ustasına gəlincə, o, sonradan əməlindən peşman olub. Çünki polis əməkdaşları ona "VAZ"-ın axtarışda olduğunu bildiriblər.
Faktla əlaqədar cinayət işi açılıb, istintaq tədbirləri davam etdirilir.
