Məhkuma gətirilən kartofun içindən telefon çıxdı

Cəzaçəkmə müəssisəsinə qadağan olunmuş əşyaların keçirilməsi cəhdinin qarşısı alınıb.

Ədliyyə Nazirliyi Penitensiar Xidmətindən Ölkə.Az-a verilən məlumatda bildirilir ki, Xidmət əməkdaşları tərəfindən 11 saylı cəzaçəkmə müəssisəsində saxlanılan, Azərbaycan Respublikası Cinayət Məcəlləsinin 29,120.2.2: 29,120.2.7-ci maddələrinə əsasən 11 il 3 ay müddətinə azadlıqdan məhrum edilmiş məhkum Nizami Paşa oğlu Xəlilovun yanına qısamüddətli görüşə gələn xalası oğlu, Bakı şəhər sakini Fərid Məhiyəddin oğlu Tahirovun üzərinə və gətirdiyi sovqata baxış keçirilib.

Baxış zamanı F.Tahirovun əynindəki pencəyin cibindən 1 ədəd yaddaş kartı, sovqatda olan kartofun içərisində xüsusi üsulla gizlətdilmiş 1 ədəd “M5” markalı mobil telefon aparatı, 1 ədəd “Nar” və 1 ədəd “Bakcell” danışıq kartları aşkar edilərək götürülüb.

Fakt üzrə toplanılmış materiallar hüquqi qiymət verilməsi üçün Ədliyyə Nazirliyinin İstintaq idarəsinə göndərilib.