Bakıda “İŞİD-çi” gəncin oğurladığı uşaq belə xilas edildi

Sabunçu rayonunun Şuşa şəhərciyində İŞİD-çi olduğu deyilən şəxs tərəfindən oğurlanan 8 yaşlı uşağın xilasolunma görüntüləri yayılıb. 

Ölkə.Az-ın ANS PRESS-ə istinadən verdiyi məlumata görə, görünütlərdən aydın olur ki, tikintisi başa çatmamış ikimərtəbəli tikilidə əlləri, ayaqları və gözləri yapışqanlı lentlə bağlı vəziyyətdə olan Hüseyn valideynləri tərəfindən tapılıb. 

Ailə və yaxınları onun salamat olduğuna sevinərək əl-qolunu açırlar. Azyaşlı isə başına gələnləri durmadan təkrarlayır.

Hadisə 2 gün əvvəl baş verib. 8 yaşlı Hüseyn Ramazanlı həyətdə velosiped sürərkən Abşeron rayon sakini Elnur Məmmədov tərəfindən qaçırılıb. Uşağın yerinin müəyyən olunmasında qonşuluqdakı 12 yaşlı Ülvi adlı uşağın köməkliyi olub. Belə ki, cinayəti törədən şəxs əvvəlcə Ülvini oğurlamaq istəyib, lakin atasının yanına gəldiyini gördükdən sonra fikrindən daşınaraq Hüseyni oğurlayıb.

Bakı şəhər Baş Polis İdarəsinin Cinayət Axtarışı İdarəsi və Sabunçu Rayon Polis İdarəsinin 12-ci Polis Bölməsi əməkdaşlarının həyata keçirdikləri əməliyyat-axtarış tədbirləri nəticəsində artıq hadisəni törədən Abşeron rayon sakini Elnur Məmmədov tutulub.

Faktla bağlı Cinayət Məcəlləsinin 144.3 (adam oğurluğu) maddəsi ilə cinayət işi başlanılıb, istintaq gedir.