Əvvəl arvadını bıçaqladı, sonra üzr istədi

Abşeron polisi həyat yoldaşını bıçaqlayıb qaçan şəxsi saxlayıb. 

Ölkə.Az Anspress-ə istinadən xəbər verir ki, Xırdalan şəhərində 3 gün əvvəl həyat yoldaşını bıçaqlayaraq evdən qaçan şəxs bu gün Abşeron polisi tərəfindən saxlanılıb.

Yaralı 46 yaşlı İlhamə Abbasova çoxsaylı bıçaq xəsarətləri ilə xəstəxanaya çatdırılıb və onun həyatı xilas edilib. 46 yaşlı İlhamə Abbasovanı evdə bıçaqlayaraq qaçan həyat yoldaşı 47 yaşlı Eldar Abbas oğlu Abbasov istintaqa ifadə verərkən cinayəti törədən zaman içkili olduğunu bildirib. 

"Şkafdan bıçağı götürdüm, iki dəfə qolundan, bir dəfə də qarnından vurdum".

Həyat yoldaşını bıçaqladığına görə peşman olduğunu deyən Eldar cəzasını çəkdikdən sonra İlhamə xanımın onu bağışlayacağına ümid etdiyini də deyib: "Mən həmişəki kimi mehribanam. Yoldaşımdan da öz səhvimə görə üzr istəyərdim".

İndi həbsxanaya yola salınan Eldarın yeganə istəyi həyat yoldaşının onu bağışlamasıdır. Onun alacağı həbs cəzasının müddəti isə məhkəmənin yekununda bəlli olacaq.

Bənzər hadisə mayın 19-da Sumqayıtın H. Z. Tağıyev qəsəbəsində baş verib. 29 yaşlı Famil Adıgözəlov aralarında yaranan şəxsi mübahisə zəminində həyat yoldaşı, 32 yaşlı Xalidə Adıgözəlovaya bıçaq zərbələri endirib. Ağır bədən xəsarətləri alan qadın hadisə yerində ölüb. Arvadının öldüyünü görən F. Adıgözəlov daha sonra bıçaqla öz boğazını kəsib.

Onun bir neçə gün əvvəl həbsdən çıxdığı deyilir. Həbsə düşməsinə səbəb isə ilk evliliyindən olan azyaşlı oğluna görə aliment ödəməməsi olub.  

Faktla bağlı Sumqayıt Şəhər Prokurorluğunda cinayət işi açılıb, araşdırma aparılır.

Ölkə.Az