Azərbaycanda “Topaz” daha bir ailəni güdaza verdi

Şəhid ailələri üçün nəzərdə tutulmuş evi almaq istəyən Təhməzovlar ailəsi indi ödədikləri pulu geri ala bilmir. Bununla bağlı “Yeni Müsavat”ın redaksiyasına şikayət edən Aysel Təhməzova deyir ki, bir ilə yaxındır ki, Nahid Həşimov adlı şəxs onlardan aldığı pulun 26 min manatını geri qaytarmır. A.Təhməzovanın sözlərinə görə, hadisə belə baş verib:

2013-cü ilin oktyabr ayında Təhməzovlar ev almaq üçün mənzil bazarına gediblər. Orada maklerlər vasitəsilə evini satmaq istəyən Nahid Həşimov adlı şəxslə tanış olublar.

N.Həşimovun Nərimanov rayonu, Əhməd Rəcəbli küçəsi 46 V binanın 34 saylı mənzilinə baxdıqdan sonra evi 60 min manata almağa dair razılığa gəliblər, elə həmin gün Təhməzovlar N.Həşimova 2000 manat beh veriblər. Növbəti gün alqı-satqı əməliyyatını həyata keçirmək üçün notarial qaydada müqavilə bağlayan tərəflər evin sənədlərinin qaydasında olmaması səbəbindən borc müqaviləsi bağlayaraq ödənilən 60 min manatı rəsmiləşdiriblər. Müqavilənin şərtinə görə, İsmayıl Təhməzov Nahid Həşimova bir ay müddətinə 60 min manat borc verir. Bir ay müddətində Həşimovlar evi boşaldıb Təhməzovlara təhvil verməli imiş.

Bir aydan sonra da evin sənədlərinin düzəlməməsi şifahi alqı-satqı razılaşmasını pozub və İ.Təhməzov 60 min manatı geri istəyib.

Aysel Təhməzova deyir ki, Nahid Həşimov bir aydan sonra onlara 34 min manat pulu geri qaytarıb: “Geriyə qalan 26 min manatı isə bir ilə yaxındır ki, ala bilmirik. Səhv bizdə oldu ki, ona inanıb alqı-satqı müqaviləsi yox, borc müqaviləsi bağladıq, özünü dindar adam kimi təqdim edib bizi aldatdı. Bu ilin yanvar ayında məcbur olub, Nahid Həşimovdan Xətai Rayon Polis idarəsinə şikayət etdik. Polis də onun lehinə qərar çıxarıb. İndi həmin adam həbsdədir. Biz pulumuzu kimdən alacağımızı bilmirik”.

Qeyd edək ki, sözügedən mənzil 2009-cu ildə Nərimanov RİH tərəfindən Həşimova Aygün İmran qızına verilib və orada Nahid Həşimov yaşayıb. Cinayət işini aparan Xətai RPİ-nin İstintaq Şöbəsinin müstəntiqi Səbuhi Mehbalıyev prosesdə aldatma faktının olmadığını və Nahid Həşimovun 26 min manat pulu xərclədikdən sonra imkansızlıqdan bu məbləği ödəyə bilmədiyi qərarına gəlib və işə xitam verib.

İndi Təhməzovlar 26 min manat pulu geri ala bilmədiklərini və Xətai Rayon Prokurorluğuna müraciət edəcəklərini deyirlər.

Nahid Həşimovun kimliyini və onun bu prosesdə nə dərəcədə təqsirli olduğunu müəyyənləşdirmək üçün yaxın qohumları ilə əlaqə saxlamağa çalışdıq. N.Həşimovun həyat yoldaşı ilə əlaqə saxlamaq mümkün olmadı. Prosesin şahidlərindən biri olan N.Həşimovun qaynının yoldaşı Samirə Muradova bildirdi ki, Nahidin yoldaşının bu hadisədə heç bir günahı yoxdur: “Nahidin həmin ailəyə borclu olması doğrudur. Ancaq xanımının bu işlə əlaqəsi yoxdur. İndi Nahid həbsdədir. Banklara da külli miqdarda borcu var. Yoldaşım hər ay aldığı maaşı aparıb onun borclarına ödəyir, ailənin maddi yükünü də biz çəkirik.”

Samirə Muradovanın sözlərinə görə, Təhməzovlar ailəsi də tez-tez onları narahat edir, ancaq baş verənlərə görə günahkar özləridir: “Pulu verən adamın ağlı harada idi 60 min manatı tanımadığı adama heç bir sənədsiz verirdi? O insanın görünüşünə baxanda kim olduğu bəlli olur. Ona veriblər pulu, o da aparıb ”Topaz"da uduzub, sonra da həbs olunub. O, tüfeyli həyat keçirən bir insandır, aldığı pulu da sağa-sola səpir, ailəsinə heç bir pul vermir, biz baxırıq onlara da".

N.Həşimovun özünü dindar kimi qələmə verib Təhməzovların inamını qazanmasına gəlincə, Samirə xanım deyir ki, o adamın din haqqında heç bir anlayışı yoxdur, tüfeyli həyat keçirən bir adamdır, sadəcə ailəni aldatmaq üçün bu yola əl atıb.

Redaksiyamıza daxil olan şikayətlə bağlı, gün ərzində Xətai Rayon Polis İdarəsinin baş leytenantı Səbuhi Mehbalıyevlə əlaqə saxlamağa çalışsaq da bu, mümkün olmadı. Onun cinayət işinin icraatına xitam verilməsi ilə bağlı qərarın sonluğunu təqdim edirik:

“İstintaq zamanı toplanmış sübutlar əsasında müəyyən edilmişdir ki, Həşimi Nahid Natiq oğlu Nərimanov rayonu, Ə.Rəcəbli küçəsi 46 V, 34-cü mənzildə, qanuni əsaslarla yaşamış, həmin mənzilə varislik hüququ olmuşdur. Yaşadığı evi satmaq istəməsi əməliyyatında alıcıya qarşı etibarından sui-istifadə etməmiş, mənzilin qeydiyyat şəhadətnaməsinin olmadığını, mənzilə dair yalnız orderin olduğunu İsmayılov Təhməzova demiş, hər ikisinin birlikdə səyləri nəticəsində, qeydiyyat şəhadətnaməsinin bir ay müddətində alınmasını güman etdiyindən, mənzilin satılması borc müqaviləsi formasında rəsmiləşdirilməsinə icazə vermişdir. Bir ay müddətində ondan asılı olmayan səbəblərdən şəhadətnamənin alınması mümkün olmadığından və borc adı ilə aldığı pulun bir hissəsini şəxsi ehtiyac üçün xərclədiyindən pulun 34 min manatını İ. Təhməzova qaytarmış, qalan 26 min manatı isə, aldatma niyyəti olmadan qaytarmasına söz vermişdir. Lakin maddi imkanı olmadığından qaytara bilməmişdir. Qeyd olunanlar əsasən, N. Həşimovun hərəkətlərində cinayət tərkibi olmadığından fakt üzrə başlanılmış cinayət işinin icraatına xitam verilmişdir”.

Ölkə.Az